LARREPETIT

Laetitia Perrais

Goizalde Landabaso -

2018ko otsailak 27
Egunkari batean irakurritako gomendioari jarraituz heldu naiz Ivan Jablonka historialari frantsesak idatzitako Laetitia ou la fin des hommes/Laetitia o el fin de los hombres (Laetitia edo gizonen amaiera) liburura. 2011n Frantziako hedabide guztiek hizpide izan zuten Nantes inguruan hildako 18 urteko Laetitia Perrais. Egilea berehala atxilotu zuten, baina Laetitia Perraisen gorpua aurkitzea kostatu zitzaien. Ahizpa zuen Jessicak aurkitu zuen goiz batean Laetitiaren motoa bazterrean botata, eta, une horretan, atzera bueltarik izango ez zuen amesgaiztoa hasi zen. Hedabideek odola nahi zuten, politikari zenbaitek (eta batez ere orduko presidentea zen Nicolas Sarkozyk) ere bai, eta Laetitia Perraisen bizitza eta heriotza publiko bihurtu ziren modurik okerrenean. Sarkozyk epaileen kontra egin zuen lege zorrotzagoak eskatuz; eta epaileek greba entzutetsuari ekin zioten. Laetitia larrutu egin zuten, bere bizitzaren gauzarik ñimiñoena ere bazka bihurtu zen. Jablonkak ondo azaltzen du gertatutakoaren zergatia. Zergatik, beste hilketa batzuk izan arren, 18 urteko Laetitiarena perfektua bilakatu zen hedabide eta interes politikoentzat. Une bateko erradiografia da, gizarte bat mikroskopiopean, bazterreratuen istorioak Frantzia, ustez, aberats batean. Ederra egin zait, batez ere, zein gizatasunarekin babestu dituen Laetitia eta bere ahizpa Jessica. Idazleak Laetitiaren bizitza berregiten du samurtasun ikaragarriarekin. Hedabideen jarduna gogor kritikatzen du, baina batik bat, hedabideen bazka jan zutenak, alegia, hiritarrak. Jablonkak idatzitako lanak, Le Monde eta Medicis sariak jaso zituen. Laetitia gaizkile anker baten biktima izatetik 18 urteko neska alaia izatera pasatuko da liburuan. Jablonkak heriotza ostekoak kontatzen ditu, baina baita heriotza aurreko bizitza labur bezain desegituratuaren xehetasunak ere. Zail da sinestea, baina gordintasunean bakea eman dit.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna