Ekialdeko herriak elkar hartuta NATOn, Errusiari aurre egiteko

NATO aliantza militarreko kide diren Europa Ekialdeko eta Balkanetako bederatzi herrialdeetako agintariak Bukaresten bildu ziren atzo, eta etorkizunean elkar hartuta jardutea hitzartu dute. Errusiaren «jarrera erasokorra» dela kausa, indarrak biltzea erabaki dute, eskualdean «presentzia militar sendo, sinesgarri eta iraunkor bat» eduki ahal izateko.

Errumania, Bulgaria, Estonia, Letonia, Lituania, Eslovakia, Hungaria eta Poloniako presidenteak eta Txekiar Errepublikako Kongresuko buruak «oso kezkatuta» agertu dira Moskuk beren mugaldetik gertu erakutsi duen ekinbide militarragatik, eta NATOren «defentsa kolektiboa» indar gehiagorekin bermatzeko eskatu dute.

Errusiak nazioarteko legedia betetzea «ezinbestekoa» dela nabarmendu dute Europa Ekialdeko eta Balkanetako bederatzi agintariek: «Europaren segurtasunerako arkitekturari kalte egin diote Errusiak Ukrainan egindako ekintza erasokorrek, tartean Krimearen bat egite legez kanpoko eta zilegitasunik gabeak, ukrainar separatistei emandako babesak eta auzoko herrialdeetan egindako ekintza militarrek».

NATOko idazkariorde Alexander Vershbow bileran izan da.