HITZ ETZANAK

Eskumuinak

Andoni Egaña -

2018ko otsailak 27
Felipe VI.a erregeari ez diote harrerarik egin Kataluniako Parlamentuko presidenteak eta Bartzelonako alkateak. Ulertzekoa da joan zen udazkeneko bere hitzen eta ekintzen ondoren. Bisitaldia dela eta, hitz bat ibili da dantzan belarriak ernarazi dizkidana. Berriek baitiote aipaturiko bi kargudunak ondorengo afaritara joan zirela baina ez «besamanos» delakora.

Sakonean, burumakurtzea adierazten duen harrera-ekitaldia izango da «besamanos» hori, baina niri euskarazko eskumuin hitza ekarri dit azalera. Gurean ere tankerako zerbait izango zen garai batean, eskuan muin emanez batak besteari onartzen zion nagusitasuna. Orain badakigu zertan geratu den: bitartekari baten bidez presente ez dagoenari bidaltzen diogun diosala da eskumuinak.

Eta paradoxikoa da Espainiako erregeak Katalunia bisitatzeko arrazoia Mobile World Congress delakoa izatea. Sakelakoek ekarri baitute eskumuinak hitzaren gainbehera. Inork ez dio jada inori eskumuinik bidaltzen, zorionak, agurrak edo denak direlakoak teklatutik pantailara igortzen baitira, sarea bitarteko bakar. Pena da. Eskumuinek hiru pertsona baitituzte duintzen: bidali dituena, enkargua jaso eta betetzeaz gogoratu dena eta esker onez jaso dituena.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna