HITZ ETZANAK

Xinple

Andoni Egaña -

2018ko apirilak 15
Zer pentsatzen dudan garraiolariek Gipuzkoako errepideetan bidesaria ordaintzeaz? Txilen harrapatutako otarrainxkak Hanburgon lehorreratu, zuritzeko Marokora eraman eta handik Euskal Herrira ekartzen dituzten bitartean beti sortuko direla ika-mikak eta injustiziak. Hain ibilbide luzean batzuek galtzaile eta besteek irabazle behar dute derrigor. Hortik aurrerako xehetasunak… Mundu konplikatuegia eraiki dugu erantzunak xinpleak izan daitezen.

Zer pentsatzen dudan gaur Donostian ehiztariek burutu behar duten manifestazioari buruz? Esanguratsua iruditzen zait inoren bizibide ez den zerbaitegatik kalera irteteko prest egon eta bizimoduari zuzenean dagozkion kontuetan —soldata, lan-baldintza prekario eta gainerako— prestutasun hori hainbestekoa ez izatea. Hortik aurrerakorik, basurde edo orkatz gehiegi dagoen, ehiztariek baserritarrekiko edo mendizaleekiko ze harreman duten, zer-nola arautua dagoen ehiza… ez dakit.

Tipo xinplea naiz ni, ideiak harrapatu eta zukutzeko gai ez dena eta horregatik hitzei soilik erreparatzen diena. Horretan zintzoa naiz, ordea. Beti esango dut «mendira joatea gustatzen zait» eta ez inoiz «naturarekin harremanean egotea atsegin dut». Ulertzen ez dena hobe ez esanda.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna