Zazpi hizlarik hitz egin dute Elkarrekin Podemos koalizioak Bilboko Euskalduna jauregian egin duen ekitaldi nagusian, baina, guztien artean, batek erakarri ditu hedabideen arreta eta entzuleen txalorik beroenak: Ione Belarra Espainiako Eskubide Sozialetako ministroa Bilbon izan da—«etxean», berak esan duen moduan—, eta han, Elkarrekin Podemos koalizioarentzat botoa eskatzeaz gain, gogor jo du EAJren eta PSE-EEren kontra. Haren esanetan, bi alderdi horiek «aliantza kontserbadorea» osatzen dute, eta «ezer ez aldatzea» da haien helburu nagusia.
Batez ere, Etxebizitza Legea izan du hizpide Belarrak bere jardunean. Esan duenez, gaur egun «desberdintasun ardatz nagusia» da etxebizitza: «Errentetatik eta ezer ez egitetik bizi direnen eta alokairuan bizi direnen artekoa da desberdintasunik behinena». Alokairua «baliabideak herri klaseetatik goiko eliteetara lekualdatzeko ponpa» gisa definitu du: «Etxebizitza Legearekin hori aldatu nahi izan dugu, baina benetako borroka orain hasten da: maiatzaren 28ko hauteskundeak Etxebizitza Legeari buruzko erreferenduma izango dira».
Espainiako Gobernuan bazkide duten alderdiaren jarrera kritikatu du Belarrak, etxebizitzaren eta soilik baietz da baietz legearen inguruan gertatutakoaren harira: «Feminismoak inoizko garaipenik handienetako bat lortzen duenean, eskuina oldartu egiten da, eta PSOEri hankak dardarka hasten zaizkio».
Horregatik, Belarraren ustez, beharrezkoa da haien esparru politikoa gobernuan egotea: «PSOE bakarrik dagoenean badakigu zergertatzen den, eta azken asteetan ikusi dugu, Arturo Espejo, itxura guztien arabera Mikel Zabalzaren heriotzaren erantzule dena, teniente jeneral izendatu dutenean».
«Atzamar bat ere ez»
Belarrarekin batera, Eneritz Madariaga Bizkaiko ahaldungai nagusia, Ana Viñals Bilboko alkategaia, Pilar Garrido Ahal Dugu-ko idazkari nagusia, Iñigo Martinez Ezker Anitza-IUko Antolakuntza idazkaria, Ismael Gonzalez Espainiako IUko Antolakuntza idazkaria eta Berdeak Equoko Joserra Becerra aritu dira hizlari ekitaldian. Hark ere etxebizitza eta horri buruzko legea izan ditu hizpide: «Bizkaian, azken berrogei urteetan berberak egon dira agintean, eta denbora horretan atzamar bat ere ez dute mugitu etxebizitzaren arazoa konpontzeko».
Madariagaren arabera, Elkarrekin Podemos da «erakundeetan etxebizitzarako eskubidea bermatuko duen indar bakarra», eta, horregatik, botoa eskatu du koalizioarentzat.
Udal eta foru hauteskundeak. Bizkaia
Belarra: «EAJk eta PSEk ez dute nahi ezer aldatzea»
Espainiako ministroa Bilbon izan da, Elkarrekin Podemosen ekitaldi batean. «Aliantza kontserbadoretzat» jo du EAJk eta PSEk osatutakoa
Iruzkinak
Ez dago iruzkinik
Ordenatu
