Noiz sortua: 2019-05-30 00:30:00

Udal eta foru hauteskundeak. Ondorena

PSEk «itun globala» nahi du

Mendiak dio «Euskadirako akordioa» bilatuko dutela. EAJren arabera, «zabalik» dago guztia
Idoia Mendia PSE-EEren idazkari nagusia, atzo, Bilbon.
Idoia Mendia PSE-EEren idazkari nagusia, atzo, Bilbon. BERRIA Tamaina handiagoan ikusi

Gotzon Hermosilla -

2019ko maiatzak 30
Joan den igandeko foru eta udal hauteskundeen ondoren, alderdi politikoak hasi dira mugimenduak egiten itunak lortzeko xedez. PSE-EEko idazkari nagusi Idoia Mendiak esan du EAJrekin «akordio globala» izenpetzea dela haien nahia; hau da, udal eta foru erakunde guztietan ezarriko litzatekeena, tokian tokiko berezitasunen gainetik. Baina horren eragina Araba, Bizkai eta Gipuzkoara mugatu du: «Guk Euskadirako akordioak bilatuko ditugu».

Aurreko egunetan, zenbait burukide jeltzalek iradoki dute PSE-EErekin negoziatzerakoan aintzat hartu beharko liratekeela Pedro Sanchezek (PSOE) Espainian gobernua eratzeko laster abiaraziko dituen negoziazioak eta Nafarroan gehiengoa osatzeko helburua dutenak. Mendiak erabat baztertu du aukera hori: «Nik euskal herritarren interesez hitz egingo dut. EAJk Madrilez edo Nafarroaz hitz egin nahi badu, azal dezala».

Lehenak izan ez direnetan, PSEk, EAJren babesarekin, Andoain eta Pasaiako alkatetzak lortuko lituzke, eta EAJk, PSEren botoekin, Lezo, Mendaro, Soraluze, Alonsotegi, Zaldibar eta Zigoitiakoak, denetan EH Bilduren kaltetan. EH Bilduk EAJri Durango eta Galdakao kenduko lizkioke; Irunen, EAJk alkategaia aurkezteko asmoa du, nahiz eta PSE izan den gehien bozkaturiko taldea.

Mendiaren ustez, aurreko agintaldian EAJren eta PSE-EEren arteko ituna indarrean egon izanak ez du «aldez aurretik ezer ziurtatzen», baina argi utzi du aukera hori gogoko dutela. Orain arteko hitzarmenari «positiboa» iritzi dio; esan du «logikoa» dela ikertu beharreko lehenengo aukera EAJren eta PSE-EEren arteko ituna izatea, eta erantsi du «bizikidetzarako» oso desberdina dela «hitzarmenetan PSE-EE egotea edo ez egotea». «Guk akordio globala bilatuko dugu, interes orokorra aintzat hartuz eta herritarren agendan zentratuta, eta saihestuko dugu instituzioak jardutea haustura soziala ekar dezaketen kontuetan», esan zuen Mendiak atzo, agerraldi batean.

Horretan bat etorri da Iñigo Urkullu Jaurlaritzako lehendakaria. Adegi Gipuzkoako enpresaburuen elkarteak antolatutako ekitaldi batean, Urkulluk «instituzioen egonkortasuna» goretsi du, eta erantsi horren alde lanean jarraituko dutela. «Gure helburua da orain arteko ereduari eustea; hau da, estrategiak partekatzea eta elkarrekin lan egitea, emaitza onak izaten ari delako».

Antzeko mezuak

EAJren hautetsi eta bozeramaileei dagokienez, den-denak antzeko mezu bati jarraitzen ari zaizkio: oraindik ez dago ezer erabakita, eta aukera guztiak «zabalik» daude, baina gutxi-asko denek aitortzen dute PSE-EErekin ituna egitea dela aukerarik hurbilena.

Adibidez, Ramiro Gonzalez EAJren Arabako ahaldungai nagusiak esan du akordioa ez dagoela «egina» eta «guztiekin» hitz egingo dutela, baina, era berean, goraipatu egin du EAJk eta PSE-EEk orain arte izandako ituna: «Pozik gaude azken lau urteetan egindako kudeaketaz eta PSE-EErekin egindako akordioaz. Gainera, hauteskundeetan herritarrek esan dute ondo irizten diotela foru gobernuak egindakoari».

Antzera mintzatu da Imanol Lasa Gipuzkoako Foru Aldundiko jarduneko bozeramailea (EAJ). Haren esanetan, ez dute inongo alderdirik «baztertzen» akordioak egiteko, «Gipuzkoan ez dagoelako betorik». Baina azkeneko agintaldian EAJk eta PSE-EEk izandako lankidetzaren fruituak goraipatu ditu, eta esan du herritarrek botoen bidez «sostengua» eman diotela kolaborazioan oinarritutako eredu berri eta ireki» horri.

Edonola ere, Lasak argi du «akordio sendoak» bilatu behar dituztela instituzioen egonkortasuna bermatzeko. Baina, haren iritzian, «zabalik» dago guztia: «Akordioak askotarikoak izan daitezke. Gobernua osatzeko akordioak izan daitezke, edo legegintzaldirako itunak, oposizioko alderdiek zenbait egitasmo estrategiko babes ditzaten». Gipuzkoan ere EAJk irabazi du, eta EH Bildu izan da bigarren indarra.

Adierazpen horiek guztiak bat datoz EAJren BBBren presidente Itxaso Atutxak esandakoarekin. Atutxak ere alderdi guztiekin hitz egiteko prestasuna adierazi du, baina erantsi du «seguru asko» PSE-EErena dela mahai gainean jarriko den «lehen aukera» akordioak ixteko.

EAJren EBB Euzkadi Buru Batzarrak bilera egingo du datorren astelehenean, eta han zehaztuko du zein izango den itunei buruzko negoziazioetara eramango duen estrategia.

Albiste gehiago

Apirilaren 2an eguneratua, 13:00etan. ©BERRIA

Koronabirusaren azken datuak

Berria

Euskal Herrian 10.022 gaixok eman dute positibo koronabirusaren proba eginda. 555 hil dira. COVID-19 gaitza izandako 2.459 pertsonari eman diete alta. Grafikoak, albiste barruan.

Gizon bat, Zagreben. ©ANTONIO BAT / EFE

Sakelakoen kokapena jasoko du Madrilek

Berria

Telefonica, Orange eta Vodafone konpainiek euren sareak erabiltzen dituzten sakelakoak non dauden kontrolatuko dute, eta informazioa Madrilgo Gobernuari emango diote. Koronabirusaren aurkako borrokan, populazioaren inguruko mugimenduei buruzko datuak biltzea da asmoa, Madrilen arabera, eta, gaineratu duenez, ikerketak ez ditu “gizabanakoen mugimenduak atzemango”, baizik datu “anonimoak eta multzoka”.

Murga, Urkullu eta Beltran de Heredia, diputazio iraunkorrean telematikoki azalpenak ematen. ©/ Irekia

Oposizioak «gardentasun falta» egotzi dio Urkulluri

Irati Urdalleta Lete

Iñigo Urkullu Jaurlaritzako lehendakariak azalpenak eman ditu Eusko Legebiltzarreko diputazio iraunkorreko bilkuran, EH Bilduk hala eskatuta. Argudiatu du «osasun arduradunen ezagutzan eta unean-unean jasotako informazioan oinarrituta» jokatu dutela.

Donostiako ospitaleko langile batzuk, mobilizazio batean ©Jon Urbe (Foku)

Osasuna bermatzen ez duten enpresak, fiskaltzara

Jokin Sagarzazu

LABek langileen kexak igorriko dizkio, zigor instrukzioko prozesuak ireki ditzala eskatzeko. Ohartarazi du oinarrizko zerbitzu batzuk «kolapsoan» daudela. ELAk, berriz, materiala bermatzeko eskatu dio EAEko Auzitegi Nagusiari.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna