BOZ GORA
Euskaraz jori ariko diren politikariak
Euskararen erabilera sustatzearen aldeko jarrera indartsua da Araba, Bizkai eta Gipuzkoan. VII. Inkesta Soziolinguistikoak berriki jakinarazitako datuak horra: haur guztiek euskara ikasi behar dutela iritzi dute herritarren % 89,3k, eta administrazioan sartzeko euskara jakin beharko dela, berriz, % 74,7k. Nafarroan %30 daude euskara sustatzearen alde. Aintzat hartzeko portzentajeak dira, baina, paradoxa badirudi ere, gai horren gaineko desadostasunak agerian direla heldu dira hauteskundeok: hilabeteotan ebazpen ugari eman dituzte epaitegiek administrazioak euskararen ezagutza eta erabilera bermatze aldera ezarrita dituen hizkuntza eskakizunen kontra.
Doi erreparatzen zaie egunotan hautagaien keinuei, hitzei eta esateko moduei. Haien hizkuntza gaitasunari ere begiratzen zaio usu. Elkarrizketak-eta egiteko orduan gaztelaniaren hautua egin dute hainbatek. Gutxieneko ezagutza bat izango dute gehienek, baina esan nahi duten hori erdaraz hobeto adierazten dutela sentitzen dute seguruenera. Herritarren parte handi bati gertatzen zaio hori bera. Ulertzekoa ere bada; hiztunen lehen hizkuntzak eragina du gaitasunean, eta euskaldun berriak eta jatorrizko elebidunak duela 30 urte baino bi aldiz gehiago dira orain, adibidez, Araba, Bizkai eta Gipuzkoan. Uharte bakanak dira, gainera, hiztun horietako asko.
Egoera hori delarik, euskarazko munduak eraikitzen jarraitzea ezinbestekoa da. Hizkuntza eskakizunak mundu berri honetara egokitzeko lege esparru berri bat ere behar da. Baina ereduak ere beharko dira bidean: euskaraz jori eta eroso jarduten duten politikariek, euskaraz naro leitzen dutenek, erruz lagundu dezakete.
Gaiak
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.
