DONOSTIA. Udan zehar indarkeriaren hainbat biktima gogoratzeko plakei eginiko erasoak arbuiatu ditu Foro Sozial Iraunkorrak, argudiatuta «oinarrizko eskubidea» dela giza eskubideen urraketen biktima izan direnak «espazio publikoan oroitu ahal izatea». Foro Sozial Iraunkorraren esanetan, gisa horretako erasoek «birbiktimizazioa» eragiten dute, « baita mina ere beren gertuko senide eta lagunengan, beren familia politikoengan».
Etxarri Aranatzen (Nafarroa), Mikel Arregi gogoratzeko plaka bat ostu dute, eta beste hainbeste egin dute Iruñean, hiru aldiz, 1978ko sanferminetako gertakariak gogoratzeko monumentuan ezarritako plakarekin. Donostian, ETAren bost biktima gogoratzeko lurrean jarritako plakei eraso diete hirutan. Foro Sozialak uste du gertakari horiek «bizikidetza demokratikoa eraikitzeko abian den prozesuari kalte» egiten diotela, eta «aurrerapausoak emateko aukerak zailtzen» dituztela.
Bestalde, etzi eta etzidamu konbentzio bat du Araba, Bizkai eta Gipuzkoako PPk, eta «kontakizun demokratikoari» buruzkoa izango da bertan landuko dituzten ponentzietako bat. Amaia Fernandez idazkari nagusiak azaldu du gai hori jorratuko dutela «EH Bilduren errelatoa nagusitzeko arriskua» dagoelako eta indar hori «ETAko kideen omenaldien atzean» dagoelako.
Foro Sozialak biktimak oroitzeko plaken alde egin du
Donostiako, Iruñeko eta Etxarri-Aranazko erasoak arbuiatu ditu, «birbiktimizazioa» eragiten dutelako
Iruzkinak
Ez dago iruzkinik
Ordenatu
