GASTEIZ. Araba, Bizkaia eta Gipuzkoa bisitatu zuten turisten kopuruak gora egin zuen 2019an. Eustatek argitaratutako datuen arabera, 3.441.967 lagun izan ziren hiru lurraldeetako batean joan den urtean, 2018an baino %3,6 gehiago. Era berean, gora egin zuen ostatuetan turistek igarotako gauen kopuruak ere: aurreko urtean baino %3,3 gau gehiago.
Hazkundea, ordea, ez da orekatua izan hiru herrialdeetan. Hiruretatik bisitari gehien hartu zuena Bizkaia da (%46,9), eta, han, %3,9 gehitu ziren sarrerak. Hazkunde handiena, berriz, Gipuzkoak izan zuen; 2018an baino %5,6 bisitari gehiago hartu zituen, eta hiru lurraldeetako batera datozen bidaiarien %39,7 joaten dira hara. Araban, bestalde, behera egin dute zenbakiek: %2,9 murriztu da lurraldea bisitatu dutenen kopurua.
Turistak hartzen dituzten establezimenduen artean, apartamentu turistikoek gorakada izan dute azken urteetan. Joera hori baieztatu egin dute Eustaten datuek ere: gisa honetako apartamentuek 89.986 pertsona hartu zituzten 2019an, 2018an baino %13,5 gehiago. Nekazaritza turismo eta landetxeek, berriz, behera egin dute: 167.007 lagun hartu zituzten, aurreko urtean baino %3,1 gutxiago.
Prezioari dagokionez, Araba, Bizkai edo Gipuzkoako ostaturen batean gaua igarotzeko 93,4 euro ordaindu behar izan ziren, batez beste; 2018an baino %3,2 garestiago. Gipuzkoa izan zen lurralderik garestiena.
Araban, Bizkaian eta Gipuzkoan, %3,6 turista gehiago 2019an
Hazkundea ez da orekatua izan hiru herrialdeetan; apartamentu turistikoen merkatu kuota handitu egin da
Iruzkinak
Ez dago iruzkinik
Ordenatu
