Torturatuak aitortzeko eskatu dute

GASTEIZ. Torturaren Aurkako Eguna zen atzo, eta, horren harira, hainbat ekitaldi eta aldarrikapen egin zituzten. Unai Urruzuno EH Bilduko Mahai Politikoko bozeramaileak salatu duenez, Espainiako Estatuak tortura modu «sistematikoan»erabili du euskal independentismoaren aurka. Adierazi du hori posible izan dela Espainiak zigorgabetasunean oinarritutako egitura oso bat antolatu eta diseinatu zuelako.

GKSk, berriz, salatu du «burgesiak eta haren menpeko gobernuek» behin eta berriro erabili dutela tortura, batez ere «langile mugimendu iraultzaileari» aurre egiteko. Sortuk, berriz, 111 aulki beltzez estali ditu Arrasaten (Gipuzkoa), han izandako tortura kasuak salatzeko, eta nabarmendu dute lanean jarraituko dutela egia argitara ateratzeko bidean. Bestalde, Aske antolakundeak zenbait kartel itsatsi ditu Intxaurrondoko kuarteleko atarian, han egindako torturak gogorarazteko.