13.000 lagun 'Inor Atzean Utzi Gabe' funtsen onuradun

GASTEIZ. Arabako, Bizkaiko eta Gipuzkoako 13.000 familiak baino gehiagok jaso zuten iaz Eusko Jaurlaritzaren Inor Atzean Utzi Gabe funtsean garatutako zortzi programaren diru laguntzak. Familia horietaz gain, beste 63.000 lagun izan ziren gizarte larrialdietarako laguntzen onuradun. Funts hori COVID-19aren ondorioz eratorritako bazterketa eta pobrezia egoerei erantzuteko sortu zuten, Elkarrizketa Zibilerako Mahaiko bazterketaren aurkako batzordean zenbait premia detektatu ondotik. Beatriz Artolazabal Eusko Jaurlaritzako Berdintasun sailburuak atzo xehatu zituen Inor Atzean Utzi Gabe funtsetik sustatutako zortzi programen inguruko datuak: besteak beste, iaz, etxerik ez zuten pertsonak artatzeko Aterpeak programaren bidez, 1.635 pertsonari eman zioten arreta; 511 lagunek jaso zuten laguntza psikologikoa konfinamendu eta alarma egoeran, Adi programaren bidez, eta adikzioren bat zuten 832 laguni laguntza eman zieten Erdu programaren barruan.