Emakumeen sexu esplotazioko sare bat atzeman dute

BILBO. Ertzaintzak sei pertsona atxilotu ditu Bizkaian, emakumeen sexu esplotazioko sare bateko kide izatea egotzita. Polizia operazioan Bilboko eta Barakaldoko bi etxe eta lokal bat miatu dituzte gutxienez, eta sexu esplotazioko sareko biktima ziren lau emakume «askatu» dituzte. Barakaldoko Udalak gertakaria gaitzetsi du, eta laguntza eskaini die emakumeei. Argitan emakume taldeak elkarretaratzera deitu du, gaurko, 18:00etan, Herriko Plazan. Salatu du sei hilabetean gisa horretako hiru polizia operazio egin dituztela Barakaldon, eta ikertzeko eskatu dio udalari.

Atzo zortzi, berriz, bost pertsona zigortu zituen Nafarroako Justizia Auzitegi Nagusiak, bi andre prostituziora behartzeagatik. Hamar urtetik gorako kondenak jarri zizkieten lauri. Bosgarrenari bi urteko espetxe zigorra eman zioten.