Sexu eraso bat salatu dute Tolosan

TOLOSA.Tolosako Udalak (Gipuzkoa) eta Tolosako Asanblada Feministak jakinarazi dutenez, pasa den larunbatean eraso sexista bat izan zen Tolosako skate parkean. Udalak, erasoa gaitzesteaz gain, abian jarri du indarkeria matxista jasan duten emakumeak artatzeko protokoloa; asanbladak, berriz, elkarretaratzera deitu du gaur arratsalderako: 19:00etan izango da, Triangulo plazan. Erasoa jasan duenak salaketa jarri du Ertzaintzan. Azaldu duenez, erasoa Usabal kiroldegitik gertu dagoen parkean izan zen, larunbat gauean. Tolosako Udalak argitu du «babes osoa» eskaini diotela hari eta haren ingurukoei, eta mugimendu feministarekin eta gizarte eragileekin indarkeria matxistaren aurka lanean jarraitzeko konpromisoa berretsi du. Horrez gain, nabarmendu du herritarren parte hartze «aktiboa» beharrezkoa dela erasoak eragozteko.