Kaledonia Berriko negoziazioak, maiatzera begira

NOUMEA. Gerald Darmanin Frantziako Barne eta Itsasoz Haraindiko ministroak gaur amaituko du Kaledonia Berriko hiru eguneko bisita. Independentistekin aldebiko bilkura bat izan ostean, atzo jakinarazi zuen haiei proposatu diela datorren maiatzean berriz elkartzeko, Parisen edo Noumean.

Darmaninen asmoa da Frantziaren kolonia horren estatus berriari buruzko negoziazioek bi hilabete barru jarraitzea, eta, ahalko balitz, hiruko bilera bat ere egitea, gobernuaren, independentisten eta loialisten artekoa —lerro hauek idazterako, subiranistek ez zuten erantzunik eman—. Ikusteko dago, hortaz, maiatzean egitekoak diren Kaledonia Berriko Asanblearako bozekin zer gertatuko den; Paris, behintzat, ez da horiek atzeratzearen kontra agertu.