Politikariei «hitza armagabetzeko» eskatu die Foro Sozial Iraunkorrak

BILBO. Foro Sozial Iraunkorrak koronabirusaren pandemiak ekarritako egoera aztertu du, eta «hitza armagabetzeko» eskatu diete arduradun politikoei. Foroaren Batzorde Iraunkorrak ezohiko bilera egin du, eta han aurkeztu dute azterketa. Uste dute pandemiak «lehentasun humanitarioen agenda berria» ekarriko duela eta «esperientzia komunitario berriak» azaleratu dituela, baina, era berean, «kezkagarri» begitantzen zaizkie zenbait arlo. Adibidez, «eskubide urraketak eta jarrera autoritarioak». Arduradun politiko askok «gerra erretorika» erabili dute pandemiaz berba egiteko, eta, «gerrari etengabeko erreferentziak eginez, eskubide zibilen murrizketak ekarriko dituen kultura belizistari» bide ematen ari direla uste dute. «Bizikidetza demokratikoa eraikitzeko dinamiketan sakontzea» proposatu du foroak; eta premiazkotzat jo du biktimen eskubideen eta presoen egoera normalizatzearen beharra «alderdien arteko gatazkatik» ateratzea.