Lan eskaintza publikoen eredu berria proposatu du EH Bilduk

GASTEIZ. Rebeka Ubera EH Bilduko legebiltzarkideak zenbait neurri proposatu ditu «Osakidetzan lan eskaintzen eredua eta giza baliabideetako politika» aldatzeko. Zenbait puntu jasotzen ditu proposamenak. Lehenik eta behin, espezialitate bakoitzeko azterketa bakarra egitea proposatu du, atal teoriko eta praktikoarekin, eta irizpide berak aplikatuta. Azterketa hori prestatzeko arduraduna Administrazio Publikoaren Euskal Institutua litzateke, «espezialitate bakoitzeko adituak kontratatuz».

Halaber, azterketa prestatu dutenen datuak Arartekoaren eskuetan uzteko eskatu du, «irregulartasun zantzuen balizko salaketen aurrean prebentzio gisa». Lan eskaintza publikoak lau urteko zikloetan aurreikusi beharko liratekeela gaineratu du, «baliabideak eta esfortzuak optimizatzeko». Azkenik, irizpide horiei lege bidezko babesa ematea mahaigaineratu du EH Bilduko legebiltzarkideak. Edozein neurri abiarazi aurretik, ordea, ustez jazo diren irregulartasunak ikertu behar direla zehaztu du Uberak.