EAJrentzat, industria izango da lehentasuna

LEIOA. Espainiako Kongresurako EAJren hautagai Aitor Estebanek esan du industria babestea izango dela EAJren «lehentasuna» datorren agintaldian, hori «ekonomiaren oinarria» delako eta «euskal herritarren enplegua babestea» dakarrelako.

Leioan (Bizkaia) egindako ekitaldi batean, Estebanek esan du EAJrentzat politika «elkarrizketa» dela: «Horregatik, Madrilera joango gara, besteak beste, hitz egitera, negoziatzera, eta euskal herritarrentzat onurak lortzera, industriaren arloan ere bai». Lorpen horien artean aipatu du tarifa elektrikoen aldaketa: «Aspalditik, euskal enpresak diskriminazioa nozitzen ari ziren elektrizitatearen kostuan eta, beraz, produkzioarenean, eta horrek eragina zuen lehiakortasunean eta enpleguak sortzean». Esan duenez, EAJri esker aldatu da hori.