Bakegileek bertan behera utzi dute abenduaren 19ko ekintza

BAIONA. Euskal presoen gaia Frantziako Estatuan blokeatuta zegoela ikusita, «gogorrago jokatzea» erabaki zuten Bakegileek urriaren 17an egindako batzarrean, eta abenduaren 19rako desobedientzia zibileko egitasmo bat eginen zutela iragarri zuten. Ekintza hori bertan behera uztea erabaki dute orain, ordea, eta ez da koronabirusagatik. Adierazi dutenez, gauzak aldatu egin dira mobilizazio ziklo hori iragarri zutenetik: kartzelatik atera da Frederique Haranburu Xistor, 30 urteren ondotik, baldintzapean; eta, Bakegileen iritziz, « egoera alda dezake» horrek. Bakegileek uste dute erabaki «garrantzitsua» dela Haranbururena, eta «aukera berriak» eskain diezazkiekeela bertze presoei: «30 urtez preso diren Jakes Esnal eta Ion Parot baldintzapean aske uzteko bidea ireki dezan lan egin behar dugu». Urtarrilaren 9an protesta eginen dute.