Espainiako Gorteetarako hauteskundeak. Kanpaina

EAJ eta EH Bildu kexu, eztabaidan euskal gairik ez zutelako aipatu

Berria -

2019ko apirilak 24
BILBO. Espainiako telebista publikoan eztabaida egin zuten, herenegun, Pedro Sanchezek, Pablo Casadok, Pablo Iglesiasek eta Albert Riverak, PSOE, PP, Unidas Podemos eta Ciudadanoseko presidentegaiek. Atzo, EAJk eta EH Bilduk eztabaida horri buruzko balorazioa egin zuten; Aitor Esteban jeltzaleen Bizkaiko zerrendaburuak nabarmendu zuen «Euskadi jaurtigai gisa» baino ez zutela aipatu eztabaidan, eta ez «euskal herritarrei interesatzen zaizkien gaiak ateratzeko edo konponbideak bilatzen saiatzeko». Motzean azaldu zuen Estebanek jeltzaleen posizioa: «EAJ ez badago, Euskadi ez da existitzen».

Arnaldo Otegi EH Bilduko koordinatzaileak, berriz, bere burua jo zuen eztabaidaren garailetzat, parte hartzeko aukerarik izan ez zuen arren: «Bederatzi aldiz aipatu naute, zazpi aldiz aipatu dute EH Bildu, eta nire argazkia erakutsi dute beste bi alditan. Beraz, agerikoa da debate hau geuk irabazi dugula, han bertan egon gabe ere». Erantsi zuenez, «agerikoa da eskuinarentzat eta eskuin muturrarentzat etsai bat garaitu» beharra dagoela: «Batzuek ez gaituzte nahi Espainiako Kongresuan. Zer arrazoi gehiago nahi duzue, euskal herritarrok, botoa EH Bilduri emateko?».

Espainiako lau alderdi nagusietako presidentegaiek beste eztabaida bat egin zuten atzo iluntzean, Atresmedia enpresako kateetan. Eztabaidara joatekoa zen Vox ere, baina Hauteskunde Batzordeak Atresmediari agindu zion eztabaidaren formatua alda zezala, Voxek ez baitu ordezkaritzarik Espainiako Kongresuan.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna