EAJk langabezia tasa %10etik jaitsi nahi du

GASTEIZ. Iñigo Urkullu Eusko Jaurlaritzako lehendakariak atzo Gasteizen eginiko agerraldian adierazi zuen hurrengo legealdian Araba, Bizkai eta Gipuzkoako langabezia tasa %10etik jaitsi nahi duela eta ekonomia «suspertzeko» 10.000 milioi euroko plan bat martxan jarriko duela. «Egin behar dugun guztia egingo dugu ahal dugun enplegu guztia zaintzeko eta galdu den enplegua berreskuratzeko. Nire konpromiso pertsonala da eta EAJrena ere bai», erantsi zuen alderdiko lehendakarigaiak. Adierazi zuen horretarako, besteak beste, gazte enplegua sustatzeko ekintza plan bat egongo dela.

Arantxa Tapia Ekonomia Garapen eta Azpiegituretarako sailburuak ere hitza hartu zuen: «Industria eta automozioa dira gure ekonomiaren eta gure enpleguaren motor». Gehitu zuenez, EAJren helburuetako bat da industriaren eta bere zerbitzu laguntzaileen garrantzia handitzea.