Preso adinekoak eta eriak askatzeko eskatu dute

MADRIL. Espaniako Kongresuko Unidas Podemos, ERC, Junts Per Catalunya, EAJ, EH Bildu, Mas Pais, CUP, BNG eta Compromis taldeek Espainiako Gobernuari eskatu diote COVID-19a dela-eta estatuko kartzeletan dauden presoen egoerari erreparatzeko eta egoerarik ahulenean daudenei premiazko neurriak aplikatzeko. Bost puntu biltzen ditu talde haien manifestuak. Lehenean, 65 urtetik gorako presoak eta COVID-19aren aurretik patologia serio, kroniko eta larriak zituztenak aske uzteko eskatu dute.

Bigarren puntuan, zigorraren hiru laurdenak beteta dauzkaten presoak askatzeko diote. Hirugarrenean, Osasun, Justizia eta Barne ministerioen arteko elkarlana sustatzea galdegin dute, pandemiaren egoera aztertzea eta presoei proba azkarrak egitea. Laugarrenean, presoek pandemiaren inguruko informazio osoa jasotzeko eskubidea bermatzeko eskatu dute. Azkenekoan, ahal bezain laster presoak euren bizilekutik gertuen dauden espetxeetara gerturatzeko eskatu dute.