Tourra igarota, zubia muga da berriz ere

Oren batzuk baino ez du iraun Hendaia (Lapurdi) eta Irun (Gipuzkoa) arteko oinezko zubian ibiltzeko aukerak. Bi urte baino gehiago hetsirik egon ondoan, zubia ireki zuten herenegun, Tourrarengatik. Atzo berriz hetsi zuten. Kotte Ezenarro Hendaiako auzapezak argitu du ez dela herriko etxearen erabakia, Parisena baizik. Irungo alkate Jose Antonio Santanok bat egin du erabakiaren gaineko kritikan. Egoera salatzeko prest daudela adierazi dute biek, eta ostiral honetan elkarretaratze bat egiteko asmoa dute; 18:00etan, zubian bertan.