Albistea entzun

Zentsura mozioa

"Aldi berri bat" hasi nahi dute Rajoy bota dutenek

Iñigo Urkullu Eusko Jaurlaritzako lehendakariak Gernikako Estatutua betetzeko eta autogobernuan aurrerapausoak egiteko eskatu dio Pedro Sanchez Espainiako presidente izendatu berriari.

Uxue Barkos, gaur, Nafarroako Jauregian. /
Uxue Barkos, gaur, Nafarroako Jauregian. / Jesus Diges/Efe

Gorka Berasategi Otamendi -

2018ko ekainak 1

Irribarretsu hartu ditu Pedro Sanchez PSOEko idazkari nagusiak Kongresuko gehiengoaren txaloak, presidente izendatu dutenean. Gobernua osatzeko lanari heldu beharko dio orain, eta gobernagarritasuna ahalbidetuko duen gehiengoa ere osatu beharko du, presidente izendatua izateko lortu duen babesetik harago. Horretarako, gainontzeko taldeen eskariak entzun beharko ditu ezinbestean, eta presidente izendatu berri horietako batzuk gogorarazi dizkiote hainbat aldetatik.

Uxue Barkos Nafarroako lehendakariak esan du espero duela Espainian aro politiko berri bat hasiko dela. Nafarroako eta Espainiako gobernuen artean ere harreman berri baten hasiera izatea nahi du Barkosek: "Erakundeen erregenerazio baten aldeko apustua egin da. Gizarteak behar zuen". Sanchezi eskatu dio kontsentsua bilatzeko, eta gaineratu du Nafarroan gehitzeko beharrezkoa den kontsentsua bilatzaileaz badakitela zerbait.

Iñigo Urkullu Eusko Jaurlaritzako lehendakariak "katarsi politikoa" sustatzeko eskatu dio Sanchezi. Urkulluk Gernikako Estatutua betetzeko beharra nabarmendu du, eta aurrerapausoak galdegin dizkio autogobenuaren esparruan. Horrez gain, estatu ereduaz hausnartzera deitu du, eta elkarbizitzan sakontzera. Lehendakariak "etengabeko elkarrizketa" eta "akordiorako borondatea" eskaini dizkio Espainiako presidente berriari.

Marian Beitialarrangoitia EH Bilduko diputatuak ohartarazi du Sanchezek gaur lortu duen babesa Rajoy gobernutik botatzeko "urgentziaren" ondorio izan dela. Azaldu duenez, EH Bilduk hitza eman zuen Rajoy gobernutik botatzeko bere esku zegoena egingo zuela. 

Aldiz, Kongresuan ez dago "gehiengo alternatiborik", Beitialarrangoitiaren esanetan, eta orain hasiko den agintaldian "zalantza gehiago daude ziurtasunak baino".

Diputatuarentzako albiste ona da PSOEk lehenengoz "alderdi guztiekin" hitz egiteko borondatea agertu izana, EH Bildurekin barne. Hala ere, "hori zertan gauzatzen den ikusi beharko da", Beitialarrangoitiaren iritziz. Koalizioak "eskua luzatu" dio Sanchezi, "hitz onak ekintza bihur daitezen".

EH Bilduk begi onez hartu du Rajoy gobernutik kanporatu izana, "burujabetzan, bakean eta berdintasunean oinarritutako etorkizunean oinarritutako Euskal Herria eraikitzeko bidean oztopoa izan delako urte hauetan guztietan".

Geroa Bairen iritziz, Sanchezek "elkarrizketa etapa berri bat eta estatu mailako indar aurrerakoien arteko pluraltasun aldi berri bat irekitzeko aukera du". Geroa Baik espero du PSOEren gobernua "gizarteak une honetan eskatze duenaren mailara" egotea. Horretarako, "desberdinen arteko akordioak" bilatzea galdegin dio, "Mariano Rajoyren kontrako zentsura mozioaren bozketatik harago".

Geroa Bairen esanetan, "desberdinen arteko gobernu bati eusteko zailtasunei aurre egin dakieke elkarrizketarekin, ardurarekin, ausardiarekin eta malgutasunarekin". Horren adibide aipatu du Nafarroako Gobernua.

Idoia Mendia PSE-EEko idazkari nagusiak babesa agertu dio Sanchezi, eta ziurtatu du Espainiako presidente berriak "erronka izugarri honi" erantzuten jakingo duela. "Eskerrik asko, Sanchez jauna, duintasuna itzultzeagatik. Ziur nago, gobernuko presidente bezala, erronka izugarri honi erantzuten jakingo duzula. PSOEren garaia da, akordioarena eta eskubideen hedatzearena, Espainiarentzako eta Euskadirentzako aldi berri bat".

"Pozik" ospatu du Unidos Podemosek Mariano Rajoyren gobernuaren amaiera. "Bai, ahal da" hasi dira koalizioko ordezkariak oihuka Kongresuan, ganberak Sanchez presidente izendatu duenean.

Irene Montero diputatuak adierazi du beste batzuek —PSOEri erreferentzia eginez— Rajoy botatzeko gehiengo nahikorik ez zela zioten arren gaur posible izan dela PPren gobernua amaitzea. Podemos Espainiak behar dituen aldaketak zehazteko lanean jarriko dela agindu du.

Albert Rivera Ciudadanosen esanetan, "gobernu ahul" bat eratuko du Sanchezek, eta "ezegonkortasun aldi bat" hasiko du, hauteskundeetara deitzen duen arte. Hauteskundeetara lehenbailehen deitzea galdegin dio.

Riverak ziurtatu du Ciudadanosek Rajoyren gobernuari amaiera eman nahi ziola, "baina ez era honetan". Adierazi duenez, "oso erne" jarraituko du Sanchezek independentistei zentsura mozioa babestearen truke zer emango dien. Sanchezen gobernuarentzako alternatiba prestatuko dutela aurreratu du Riverak.

Compromiseko Joan Baldovik nabarmendu du Sanchezen gobernua "zilegia" dela. Legealdi hasieran bere alderdiak esan bezala, Rajoy gobernutik kentzea posible zela frogatu da, haren esanetan. Compromis kide "leiala" izango dela aurreratu du. Balodoviren arabera, "itxaropenez betetako aldia" hasiko dela ziurtatu du, eta gaineratu du Sanchezek hitzartutakoa betetzen badu Compromisek "erraz" jarriko diola agintaldia.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Pertsona bat, atzo, Ukrainako Zaporizhia eskualdeko hautesleku batean, bozkatzeko pronto. ©EFE

Errusiarekin bat egitearen alde bozkatu dute Ukrainan okupatutako lurraldeetan

Igor Susaeta

Kievek traizioa egotziko die galdeketetan «moduren batean» parte hartu dutenei. Moskuk prest ditu anexioa gauzatzeko botere «legegilea, exekutiboa eta juridikoa»
Pere Aragones Kataluniako presidentea, atzo, politika orokorreko eztabaidan, Kataluniako Parlamentuan. ©QUIQUE GARCA / EFE

Galdeketa bat zehazteko akordio bat proposatu du Aragonesek

Gorka Berasategi Otamendi, Berriemaile berezia

Generalitateko buruak ezinbestekotzat jo du eremu sozial guztien ekarpenak jasotzea. JxCren ustez, prozesuaren batasuna eta zuzendaritza estrategikoa behar dira
1 ©ALBERTO ESTVEZ / EFE

Erreferendumak zer ekarri zuen

Igor Susaeta

Galdeketara deitu zuten, lege bat onartu zuten horretarako, eta herritarrek bozkatu egin zuten, Poliziaren indarkeriari aurre eginez. Madrilek errepresioaren bidean segitu zuen, eta kartzelatzeak eta erbesteratzeak heldu ziren.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Irakurleen babesa ezinbestekoa da kazetaritza independente eta konprometitua egiten jarraitzeko.