Azken egunetan batzoki batean baino gehiagotan egin dituzte margoketak Iruñeko Maravillas gaztetxearen hustea salatzeko. Gaur, Altsasuko EAJk salatu du batzokiaren aurkako erasoa. Argazki batean ikus daitekeenez, harriz eta hormigoiz "hormatu" diete atea, eta margoketak egin dituzte ondoan: "Uxue, utzi gaztetxeak bakean. Hormatu zuen batzokiak". Okupazioaren ikurra ere egin dute.
.@eajpnv.k #Altsasu.ko Batzokiaren kontra egindako eraso hau irmoki gaitzesten du. Eraso honek gure alderdiaren eta honen parte diren gizon eta emakumeen kontra dagoen jazarpena agerian uzten du. pic.twitter.com/l3pb6gJNHh
— EAJ/PNV Altsasu (@eaj_pnv_Altsasu) 2019(e)ko urtarrilaren 18(a)
"Eraso hau irmoki gaitzesten dugu", adierazi du Altsasuko EAJk Twitterren: "Eraso honek gure alderdiaren eta honen parte diren gizon eta emakumeen kontra dagoen jazarpena agerian uzten du". Geroa Baik ere salatu du "beste eraso bat" jasan dutela koaliziokide jeltzaleek: "Eraso onartezina da, eta ez da bakarrik gure koalizioaren aurkakoa, aldaketaren aurkakoa da". Urtarrilaren 8an ere salatu zuen Altsasuko EAJk margoketak egin eta pintura bota zietela batzokira.
Azken egunetan, Nafarroatik harago ere egin dituzte margoketak batzokietan. Besteak beste, Arrasaten (Gipuzkoa) egindakoak salatu ditu alderdi jeltzaleak.
Atzo, Iruñean, Labrit kalea moztu zuen gazte talde batek, eta bi lagun bidoi batera kateatu ziren, gaztetxearen hustea salatzeko.