Kartzelatuta dauden bederatzi politikariak urtarrileko azken astean Kataluniatik Madrilera lekualdatzeko eskatu zion Gorenak Barne Ministerioari, joan den urtarrilaren 10ean. Baina Manuel Marchena buruzagi independentistak epaituko dituen epaimahaiaren presidenteak gutun bat bidali dio, gaur, Fernando Grande-Marlaska Barne ministroari, jakinaraziz lekualdaketa hori atzeratu dezakeela.
Gorenak aurrenekoz eman du epaiketarako balizko data bat. Ez dago argi noiz hasiko den zehatz-mehatz, baina Gorena epaiketaren egutegia zehazten hasi da. Gaur-gaurkoz, defentsek egindako frogen eta lekukoen eskaerak aztertzen ari dira politikari kataluniarrak epaituko dituzten magistratuak. Probidentzia bat kaleratuko dute ondoren, eta epaiketaren hasiera data ezarri.
