2012. urtean sortu zen Harrera elkarte asistentziala, eta gaur egin du zortzigarren batzarra. Bertan jakinarazi dituzte zenbait datu: esaterako, iaz hemeretzi preso, iheslari edo deportatu ohi lan munduan integratu zirela elkartearen laguntzari esker. Zortzi urteko ibilbidean, 159ri lagundu diete.
Elkarteak makina bat kontaktu du politika, ekonomia eta gizarte alorretan, eta gustura dago jasotzen duen erantzunarekin, Karlos Ioldi bozeramaileak BERRIAri herenegun adierazi zionez: "Eragozpenik ez dugu aurkitu preso ohien-eta ibilbideagatik; gehienez, lanposturako prestakuntza ezagatik izan ditugu arazoak".
Batzarrean, elkarteak etorkizuneko erronka nagusiak definitu ditu; horien artean, nagusiki, erretiro aldian dauden preso, iheslari eta deportatu ohien egoera ekonomikoa lantzea. Izan ere, oso urte gutxi dauzkate kotizatuta, eta, beraz, pentsio apalak dituzte askok. Hiru urterako lanketa bat prestatuko du Harrerak, egoera aztertzeko. Guztira, 1.700 bat lagunekin hitz egin nahi dute horretarako, "erradiografia osoa" egiteko.
Preso ohi ugari daude 65 urteren bueltan, eta "oso kotizazio txikiarekin" iritsi dira erretiro adinera, Sebas Barinagarrementeria Harrera elkarteko presidenteak ohartarazi duenez. "Erretirorako baliabide gutxi dute".