Eusko Legebiltzarrari denbora gehiago eskatu diote autogobernu lantaldeko adituek. Araba, Bizkai eta Gipuzkoarako estatus politiko berri bat proposatu behar zuten, legebiltzarraren aginduz, ekainaren amaierarako; baina azaldu dute epeak ez dituztela beteko. Europa Press berri agentziak parlamentuko iturriak aipatuz adierazi duenez, epemuga azaroaren 30era atzeratzea eskatu dute.
EH Bilduk ohartarazia zuen aditu taldearen lan erritmoa mantxoa zela, eta atzerapen handiarekin ari zela jardunean. Estatus politiko berri baterako testu artikulatuaren proposamena garaiz aurkeztuko ez zuela ere aurreratu zuen koalizio independentistak azken hauteskunde kanpainan. Gauzak horrela, Arnaldo Otegi EH Bilduko koordinatzaile nagusiak aurreratu zuen koalizioak bere proposamena aurkeztuko duela ekainaren erdialdean.
Otegiren adierazpenak ez zituen gogo onez hartu EAJk. Andoni Ortuzar alderdiko presidenteak adierazi zuen espero zuela EH Bildu autogobernu lantaldea "lehertu nahian" ez aritzea. Izaskun Bilbao europarlamentari jeltzaleak, berriz, testu artikulatu baterako proposamena aurkeztak adostasuna erabat apurtuko zuela ohartarazi zuen.
EH Bildu prest agertu da aditu taldeari epea luzatzeko, bere lana amaitu dezan, baina atzerapen horrek "denboran mugatua" izan behar duela adierazi du, eta "parlamentuaren agindua betetzeko konpromiso batek" lagundu beharko lukeela gaineratu du.