Askatu dute Irungo korapiloa, eta harekin batera instituzioetan elkarlanean aritzeko zuten oztopo nagusia. EAJ izan da azkenean atzera egin duena. Joseba Egibar GBBeko buruak jakinarazi zuen atzo alderdiaren erabakia. Baina PSE-EEko arduradunek aho zapore mingotsarekin jarraitzen dute. Ez zaie gustatu jeltzaleek Gipuzkoako bigarren hiri nagusian izandako jarrera.
Idoia Mendia buruzagi sozialistak ohartarazi die jeltzaleei PSErekin koalizio gobernurik negoziatu nahi badute "errespetuz" jokatu beharko dutela. Ez hark eta ezta Arabako PSEren buru den Cristina Gonzalezek ez dute Xabier Iridoi Irungo zinegotzi jeltzalearen izena aipatu, baina argi utzi dute ez dutela "hordagorik" onartuko.
Mendiak nabarmendu du EAJ eta PSE gai izan direla "instituzioen egonkortasuna" bermatuko duen elkarrizketa eremu bat ahalbidetzeko eta aurreratu du sozialistek "erantzukizunez" jokatuko dutela "herritarren interesak alderdiaren aurretik jarriz".
Gasteizen bestelako emaitzak espero zituztenei ere zuzendu zaie buruzagi sozialista, eta adierazi du horiek "gutxietsi" egiten dutela alderdia eta "lurperatutzat" jo nahi dutela. "Gure proiektua zabala da eta beti egongo gara prest akordiorako eremuak zabaltzeko".
Datorren larunbateko udalbatzarretan aukeratuko dituzte datozen lau urteetarako alkateak, eta Irungo auzia argituta pentsatzekoa da foru aldundietarako ez ezik, jeltzale eta sozialistek beste hainbat udaletarako ere akordioak itxiko dituztela. Tartean EH Bildu indar subiranista lehen indarra den herri batzuetan; horien artean daude Andoain, Pasaia, Lezo, Soraluze (Gipuzkoa) eta Zigoitia (Araba), besteak beste.
