Korrika Iruñerritik igaro zenean presoen argazkiekin ateratzea leporatuta, bost pertsona atxilotu ditu Espainiako Poliziak Iruñerrian. Zehazki, "terrorismoa goratzea" egozten diete. Atxilotuak aske utzi dituzte deklarazioa jaso ostean. Ahotsa.info-k jakinarazi duenez, beste lau lagun ere ikertzen ari dira.
Atxiloketak salatu ditu Sortuk sare sozialetan eta guztiak aske uzteko eskatu du. Arkaitz Rodriguezek ohartarazi du ez dela delitu "Espainiar estatuaren espetxe politika kriminala salatzea eta euskal preso politikoei preso politiko esatea".
Atxilotuak berehala askatzeko exijitzen dugu.
— Sortu Iruñea (@SortuIrunea) 2019(e)ko ekainaren 20(a)
Bake eta bizikidetza agertoki bat eraikitzeko preso politiko eta beren senideen eskubideak bermatu behar dira. Elkartasuna ez da delitua, preso politiko guztiak kaleratu arte ez dugu etsiko! #AtxilotuakAskatupic.twitter.com/0y8HWGwiS2
AEM Amnistiaren aldeko eta Errepresioaren aurkako Mugimenduaren hitzetan, "errepresaliatuen despolitizazioa hil ala bizikoa dute gure etsaiek, horrela borroka bera delako, matxinatzeko dugun eskubidea hain zuzen ere, zilegitasuna galtzen duena". Hor kokatu ditu AEMk gaurko atxiloketak, eta "gatazkaren izaera politikoa defendatzeko deia" egin du.
Maiatzean ere izan zen antzeko operazio bat. Kasu hartan, Guardia Zibilak hiru lagun atxilotu zituen Nafarroan, 21. Korrikan euskal presoen argazkiak eramateagatik "terrorismoa goratzea" egotzita.