ADIERAZPEN ASKATASUNA

Jazarpenaren aurrean, babesa agertu dio BERRIAk Onintza Enbeitari

BERRIAko zutabegilearen aurka irainak egin dituzte sare sozialetan, eta pankartak jarri. BERRIAk "onartezintzat" jo du jarrera hori.

Onintza Enbeita, bertsolaria eta BERRIAko zutabegilea.
Onintza Enbeita, bertsolaria eta BERRIAko zutabegilea. Luis Jauregialtzo/Foku

Garikoitz Goikoetxea -

2019ko ekainak 21

Jazarpena jasaten ari da Onintza Enbeita bertsolaria eta BERRIAko kolaboratzailea, egunkari honetan argitaratutako iritzi artikulu batzuk direla eta. Sare sozialetan haren aurkako irainak hedatu dituzte, eta pankarta batzuk agertu dira Algortan (Getxo, Bizkaia). Hain justu ere, iluntzean bertso saioa du Enbeitak Algortan, eta boikoterako deia hedatu dute. Horren aurrean, BERRIAko langile batzordeak eta BERRIA Taldeak erabateko babesa agertu diote Enbeitari, eta "onartezintzat" jo dute artikulu baten egilea hala jazartzea.

Ez da lehen aldia. Udazkenean ere pintaketa batzuk egin zituzten. BERRIAko Bira atalean eguneroko iritzi emailea da Enbeita, eta joan den urrian argitaratutako artikulu baten harira ari dira jazartzen. Ernesto Guevara Che hil zuteneko urteurrenean, hari buruzko gogoeta bat argitaratu zuen, emakumeekin izan zezakeen rola hizpide hartuta. "Ez diot haren lanari ezer kendu nahi, baina ez dakizkigun datuek kezkatu egiten naute. Hala ere, ez dakit ezkutatu digutena jakin nahi dudan ala ez".

Iritzi artikulu haren ondotik, Enbeitaren aurkako mezuak zabaldu zituzten, eta aste honetan berdin egin dute, Algortan bertso saioa duela baliatuz. Besteak beste, "inperialismoaren zerbitzaria" izatea egotzi diote, eta Posmofeministak, inperialismoaren zerbitzariak eta halako leloak zabaldu. Are, Onintza, alde hemendik dioten kartelak ipini dituzte.

BERRIAko langile batzordeak eta BERRIA Taldeak "babesa eta elkartasuna" azaldu diote Enbeitari, eta jazarpena salatu dute. "Begi onez hartzen dugu eztabaidatzea, desadostasunak plazaratzea. Baina gauza bat da iritziaren aurka jotzea argudioekin; eta oso bestelako bat, aitzakia hori baliatuta pertsonen aurka jotzea. Onartezina da". Irainen "karga sexista nabarmenaz" ere ohartarazi dute.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna