Solanak berak eman du albistea, Euskalerria Irratian, gaur goizean. Hezkuntza kontseilari ohiak erran duenez, atzo arratsaldean Geroa Baiko batzar iraunkorrak hartu zuen erabakia. Batzar horretan erabaki zen Geroa Bairen senaturako hautagaia Esther Cremaes izatea.
Euskalerria Irratian egindako adierazpenetan, Solanak adierazi du "erronka zaila" izanen dela, baina "gogotsu dagoela". Nafarroa Madrilen ordezkatzea "oso garrantzitsua" dela gaineratu du: "Nafarroa Madrilen ordezkatzea oso garrantzitsua da, eta beharrezkoa da ordezkaritza hori ateratzea, Geroa Bain argi baitaukagu PSOEk edo Podemosek ez gaituztela Madrilen ordezkatuko".
Ikus-entzunezko Komunikazioko lizentziaduna da Solana, eta Hezkuntza Kontseilaria eta gobernuko bozeramailea izan da azken legegintzaldian. Skolae hezkidetza programaren arduradunetako bat izan da, eta jazarpena jasan du horren ondorioz. Maiatzeko bozen ondotik, Geroa Baiko parlamentaria da Nafarroako Parlamentuan.
