Albistea entzun

Altsasuko auzia

Gorenak kartzela zigorrak murriztu dizkie Altsasuko gazteei, baina preso segituko dute

Espetxean dauden zazpi lagunei hiru urte eta erdi eta bederatzi urte eta erdi arteko zigorra ezarri die. Auzitegiak ez du ikusi ideologiagatiko astungarriak ezartzeko arrazoirik, eta horregatik murriztu dizkiete zigorrak.

Altsasuko gazteen aldeko elkarretaratze bat. /
Altsasuko gazteen aldeko elkarretaratze bat. / Jagoba Manterola/Foku

Joxerra Senar -

2019ko urriak 9

Espainiako Auzitegi Gorenaren erabakiz ere, Altsasuko auzian kartzelan dauden zazpi gazteek preso segitu beharko dute, espetxe zigor urteak jaitsi dizkieten arren. Irailaren 18an izan zen Goreneko auzi saioa, Auzitegi Nazionalaren epaiaren aurka defentsak aurkeztutako helegitea aztertzeko, eta gaur atera du sententzia.

Zazpi laguni hiru urte eta erdi eta bederatzi urte eta erdi arteko kartzela zigorra ezarri die. Beste zigortu bati, zortzigarrenari —Ainara Urkijori—, bi urteko espetxea murriztu egin dio zerbait, baina lehen ere ez zegoen preso. Gorenak azaldu duenez, zigorrak murriztearen arrazoia izan da ez dietela ezarri ideologiagatiko astungarririk, eta, agintearen aurkako erasoaren kasuan, ez dute gehiegikeria zantzurik ikusi. Horrez gain, akusatuetako biri bertan behera utzi dizkiete lesio delituengatiko zigorrak, frogarik ez zegoelako.

Auzitegiaren iritziz, badira biktimei eragindako "lesio fisiko eta psikologikoen froga nahikoak", akusatuak segurtasun indarren aurkako delituengatik, lesioengatik eta desordena publiko eta mehatxu delituengatik zigortzeko.

Honako hauek dira Espainiako Auzitegi Gorenak ezarritako zigorrak:

Ohian Arnanz: 9 urte eta erdiko kartzela zigorra. Egotzitako delituak: autoritate agenteen aurkako atentatua, nagusitasunez hiru lesio eragitea eta desordena publikoa. Auzitegi Nazionalak 13 urteko kartzela ezarri zion. 

- Jokin Unamuno eta Adur Ramírez de Alda: 8 urte eta erdi bakoitzari. Delituak: autoritate agenteen aurkako atentatua eta nagusitasunez hiru lesio eragitea. Auzitegi Nazionalak 12na urteko kartzela ezarri zien. 

Jon Ander Cob eta Julen Goikoetxea: 7 urte eta erdi bakoitzari. Delituak: autoritate agenteen aurkako atentatua eta nagusitasunez lesioak eragitea. Auzitegi Nazionalak 9na urteko kartzela ezarri zien.

Aratz Urrizola: 4 urte eta bi hilabete. Delituak: Delituak: autoritate agenteen aurkako atentatua eta nagusitasunez lesio bat eragitea. Auzitegi Nazionalak 9 urteko kartzela ezarri zion.

Iñaki Abad: 3 urte eta erdi. Delituak: autoritate agenteen aurkako atentatua eta desordenu publikoak. Auzitegi Nazionalak 6 urteko kartzela ezarri zion.

- Ainara Urkijo: Urte eta erdi. Delitua: desordena publikoak. Auzitegi Nazionalak bi urteko kartzela ezarri zion.

Gaur kaleratu berri duen epaiak 449 orrialde ditu. Gorenaren arabera, "nahikoa froga" egon dira auzipetuek guardia zibilei eta euren bikotekideei eraso egin zietela eta lesio fisikoak zein psikologikoak eragin zizkietela erakusteko. Hala, agintaritzari eraso egitea, lesioak eragitea edo desordena publikoa eragitea, delitu horiek egin izana egotzi die Gorenak. Dena den, Aratz Urrizola eta Iñaki Abaden kasuan lesioak eragitea delitua kendu egin die, eta euren zigorra are gehiago jaitsi da.

Halaber, Auzitegi Nazionalaren aurreko bi epaitan diskriminazio larrigarria ezarri zien gazteei, eta Gorenak larrigarri hori kentzea hobetsi du. Dena den, bi magistratuk boto partikular bidez diskriminazio larrigarriari eustearen alde egin dute.

2016ko urriaren 15eko goizaldean izan ziren gertaerak, Altsasuko Koxka tabernan zein haren inguruetan. Covitek salaketa jarri eta terrorismo delitua egotzita instrukzio fasea Auzitegi Nazionalako Carmen Lamelak hartu zuen bere gain. Terrorismo delitua egoztea funtsezkoa izan zen auzi hura Nafarroan ikertua izan ez zedin. Epaiketa, berriz, iazko apirilean izan zen, eta Auzitegi Nazionaleko zigor arloko lehen aretoak atzera bota zuen terrorismoaren delitua, baina guztira 79 urteko espetxe zigorra ezarri zien gazteei.

 

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Josu Retolaza, artxiboko irudi batean. ©EUSKAL MEMORIA FUNTSA

Hiltzear zela utzi zuten aske

Maddi Ane Txoperena Iribarren

35 urte beteko dira gaur Josu Retolaza euskal preso ohia minbiziak jota hil zenetik. 33 urte zituen. Kartzelan atzeman zioten gaitza, eta aitzinatua izan arte ez zuten libratu.
Gure Esku-ren aurkezpena Baionan ©Berria

Pirinioetako Bidean parte hartzera deitu dute Baionan

Ekhi Erremundegi Beloki

Ipar Euskal Herriko hainbat pertsona ezagunek babestu du Gure Esku-k Kataluniako beste plataforma batzuekin batera antolatutako ekimena

Gure Eskuren agerraldia urtarrilaren 29an, uztailaren 2ko egitasmoa aurkezteko. ©Marisol Ramirez / Foku

Aragoiko presidenteak dio uztailaren 2an ez duela onartuko «zaborrik» Pirinioetan

Jon O. Urain

Gure Esku-k eta Kataluniako eragile batzuek mobilizazioa dute uztailaren 2an; asmoa da Pirinioetako 300 bat tontor argiztatzea.

Josu Urrutikoetxea, 2020an, Parisen, BERRIArentzat ateratako argazki batean. ©Eñaut Castagnet

Espainiako Auzitegi Nazionalak epaiketarako data jarri dio Josu Urrutikoetxeari: 2024ko urtarrila

Maddi Ane Txoperena Iribarren

1987an Zaragozako Guardia Zibilaren kuartelaren aurka egindako atentatua leporatuta epaituko dute, urtarrilaren 9an, 10ean eta 11n. 2.354 urteko kartzela zigorra eskatuko diote.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...