Albistea entzun

altsasuko auzia

Oihu bera jendetzaren ahotan: "Altsasukoak askatu"

Milaka lagun batu dira Nafarroako Auzitegi Nagusiaren aurrean, zigortutako gazteak aske utz ditzatela eskatzeko. Antolatzaileen arabera, 50.000 lagunetik gora batu dira mobilizazioan.

Jon O. Urain -

2019ko urriak 26

Espainiako Auzitegi Gorenak urriaren 9an eman zuen Altsasuko gazteen aurkako zigor epaia, eta, horren arabera, hiru urte eta erdi eta bederatzi urte eta erdi arteko zigorrak ezarri zizkien preso dauden zazpi gazteei.

Gaur, Duintasunaren Martxa izenekoa abiatu da Nafarroako herri horretatik goizean, eta Iruñera heldu da arratsaldean. Han, milaka lagunek harrera egin diote Nafarroako Auzitegi Nagusiaren atarian, han deituta baitzegoen elkarretaratze bat, sententziaren aurka protesta egiteko.

Izan ere, nabarmendu dute auzitegi horrek behar zuela auzia epaitzeko lekua, eta ez Espainiako Auzitegi Nazionalak. Bertan, "justizia eta proportzionaltasuna" eskatu dute. Antolatzaileen arabera, 52.000 bat pertsona batu dira mobilizazioan; Espainiako Gobernuko ordezkaritzaren arabera, 7.500 inguru izan dira.

Antoniutti parkean, aho batez oihukatu dute, besteak beste, Altsasuko auzian eginikoa ez dela "justizia" izan: "Esan genuen injustizia itzela zela, eta hala esaten jarraitzen dugu. Ez gara nekatuko gauza bera oihukatzeaz: Altsasukoak aske", esan dute Aritz Leoz eta Idoia Goikoetxea bozeramaileek.

Altsasuko Gurasoek eta Altsasukoak Aske plataformak deitu dute elkarretaratzera, eta hainbat indar politikok egin dute bat deialdiarekin: esaterako, Geroa Baik, EH Bilduk, Ahal Dugu-k eta Ezkerrak. Baita sindikatu eta eragile sozial ugarik ere.

Altsasukoak Aske plataformaren arabera, Auzitegi Gorenaren epaia "hiru urteko ibilbidea duen azpijoko baten azken atala" da: "Justizia eskatu dugu, eta injustizia jaso; gezurrak entzun ditugu, eta egiak oihukatu". Eskerrak eman dizkiete mobilizazioekin bat egin duten herritarrei, eta "besarkada berezia" bidali diote "Kataluniako herriari, bide honetan lagundu gaituztelako eta beren azaletan nozitzen ari direlako injustizia eta gezur berdinak".

Gurasoen arabera, sententziak "betiko" jarri du mugarri bat gazte presoen bizitzan, baina erantsi dute "arrazoi asko" daudela "borrokatzen jarraitzeko": "Demokrazia eta justizia behar dugu, eta, ez daukagun bitartean, kalean eta beharrezkoa den lekuan jarraituko dugu".

2016ko urriaren 15ean Altsasuko Koxka tabernan bi guardia zibilekin eta haien bikotekideekin izandako liskar baten ondorioz zigortu zituzten gazteak. Auzia terrorismo delitutzat jo zitekeelakoan, Espainiako Auzitegi Nazionalak hartu zuen auzia bere gain, eta bederatzi eta hamahiru urte bitarteko zigorrak ezarri zizkien, terrorismo deliturik egon ez zela ebatzi arren. Joan den irailaren 18an egin zituen auzi saioa Espainiako Auzitegi Gorenean, helegiteak aztertzeko, eta, zigor urteak murriztu arren, zazpi gazteek espetxean jarraitzeko adinako zigorrak ezarri zituen.

Auzitegi Goreneko magistratuen ustez, badira biktimei eragindako "lesio fisiko eta psikologikoen froga nahikoak", akusatuak segurtasun indarren aurkako delituengatik, lesioengatik eta desordena publiko eta mehatxu delituengatik zigortzeko.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Foro Sozial Iraunkorreko koordinatzaile Agus Hernan, atzo, Zaballako espetxean. ©JAIZKI FONTANEDA / FOKU

Foro Sozialak azken bilera egin du EPPK-ko ordezkariekin

Gotzon Hermosilla

Honenbestez, bi aldeek bukatutzat eman dute 2017an irekitako elkarrizketa iraunkorreko etapa. Foro Sozialak esan duenez, EPPK-k ontzat jo du urte hauetako harremana

Gure Esku-ko Josu Etxaburu, atzo, Eusko Legebiltzarrean. ©JAIZKI FONTANEDA / FOKU

Gure Esku-k ekintzetara igarotzeko eskatu dio Eusko Legebiltzarrari

Iosu Alberdi

Elkarteak talde parlamentarioei exijitu die eztabaida «garden eta ireki» bat hasteko, erabakitzeko eskubidea arautzea helburutzat hartuta
Armak erabilerarik gabe uzteko saioan parte hartu zutenak, Luhusoko Errekarte baserrian, 2018ko abenduan. ©/ Bob Edme

Luhusoko auziko instrukzio aldia amaitutzat jo dute

Jon O. Urain

Fiskalak hilabeteko epea du orain auziari buruzko eskaera aurkezteko.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...