Albistea entzun

Europako Batasuna

Bruselak ez du atzeraldirik espero, baina bai motelaldi luze bat

EBZk bezala, Europako Batzordeak ere eskatu dio Alemaniari gastu publikoa handitzeko.

Pierre Moscovici Europako Batzordeko Ekonomia komisarioa.
Pierre Moscovici Europako Batzordeko Ekonomia komisarioa. Olivier Hoslet / Efe

Iker Aranburu -

2019ko azaroak 7

Sasoian sasoikoa. Udazken itxura hartu du Europako Batasuneko ekonomiak, baina ez negukoa. «Ez dugu ikusten atzeraldi baterako arriskurik. Baina aurreko aurreikuspenetan ez bezala, orain ez dugu espero ekonomiaren hazkundeak berriro gora egitea 2020an eta 2021ean». Hitz horiekin laburtu zuen egoera ekonomikoa Pierre Moscovici Europako Batzordeko Ekonomia komisarioak, gaur, Bruselan. Udazkeneko Aurreikuspenean zabaldutako zenbakiek baieztatzen dute ekonomian udazken giroa dagoela: eurogunean %1,1 da haztekoa ekonomia aurten, eta %1,2, berriz, 2020an eta 2021ean; EB osoan, %1,4 hiru urte horietan. «Atzeraldiaren mugarekin lotzen den hazkunde erritmo bat».

Azkenaldian, Moscovicik aurreikuspenak gutxitu ditu iragarpenak egitera jendaurrera atera den bakoitzean. Atzokoa ez zen salbuespena izan. Aurreko iragarpenetatik lau hilabete igaro direnean, hamarren bat jaitsi du eurogunearen aurtengorako hazkunde iragarpena, eta bi hamarren 2020rakoa.

Baina kontrastea are handiagoa da duela urtebeteko iragarpenekin alderatuz gero. Orduan onartu zuen komisarioak «aldeko haizeak» baretu egin zirela, eta abiadura txikiagoa hartuko zuela ekonomiak. Denborak arrazoia eman dio, baina neurri batean bakarrik. Izan ere, %1,9ko hazkundea iragarri zuen aurtengorako EBn zein eurogunean, eta iragarpen hori oso baikor geratu zaio: zortzi hamarren gutxiago haziko dira euroguneko hemeretzi kideak, eta lau hamarren gutxiago EBko 28ak —hazkunde sendoari eusten dioten herrialde batzuk daude talde horretan, hala nola, Polonia, Txekiar Errepublika eta Errumania—.

Alemaniaren adibidea

Herrialde gehienen aurreikuspenetan egin zuen huts Bruselak, baina Alemanian inon baino nabarmenagoa izan da 2018ko udazkeneko iragarpena baikorregi izan zela: %1,7ko hazkundea iragarri zuen iaz Moscovicik, eta atzo %0,1 baizik ez dela izango ziurtatu zuen. Hau da, Bruselak uste du ozta-ozta ihes egingo diola Alemaniak atzeraldiari. Aurki kaleratuko du Berlinek hirugarren hiruhilekoko datua, eta espero da negatiboa izatea, baina halaber espero da ekonomiak erritmo pixka bat berreskuratzea urtearen bukaeran.

Alemanian ikusten da ongien ekonomiaren hazkundearen galga nagusia: industria sufritzen ari da, ziurgabetasunak inbertsioa geratzen baitu. Eta zerk eragiten du enpresek inbertitzeko beldurra izatea? Ezin jakitea zehazki zer gertatuko den Erresuma Batuarekin, eta Donald Trumpek  eragindako merkataritza gerrek. Edonola ere, Bruselaren aurreikuspena egina dago AEBen eta Txinaren arteko harremanean azken egunotan gertatu den hobekuntzaren aurretik. Gaur bertan. Pekingo gobernuak ziurtatu du muga zergak «zatika kentzea» adostu duela AEBekin. Irgarpen horrek nazioarteko merkataritza berpiztu dezake, eta mesede handia egin EBri, oro har hartuta, ekonomia esportatzailea delako —Euskal Herrikoa ere hala da—.

Ekonomiaren motelaldia noiz  arte iraungo duen iragartzera ez zen ausartu Moscovici, baina erakutsi zuen hazkunde oso apaleko aldia luzea izateko kezka baduela: «Hazkundea lautada batera iritsi da, baina espero dezagun ez dela sabaia izango».

Langabeziak, behera

Barne produktu gordinaren hazkundearen motelaldiak eragina izango du lan merkatuan ere: Batzordeak dio langabeziak jaisten segituko duela, baina azken urteetan baino astiroago. Eurogunean, %7,6ra jaitsiko da aurten, eta %7,3ra 2021ean.

Atal horretan ere ez da guztiz fin Brusela, zorionez. Duela urtebete, iragarri zuen langabezia %7,9ra jaitsiko zela 2019an, baina hazkundea txikiagoa izanagatik, are gehiago jaitsi da langabezia. Horrek esan nahi du hazkunde txikiagoa nahikoa dela orain enpleguak sortzeko.
Lan merkatuarekin arazo gehien duten estatukide guztietan jaitsiko da langabezia —Grezia, Espainia, Frantzia—, Italian izan ezik: gutxigatik ihes egingo dio atzeraldiari, eta %10eko langabezia tasari.

Moscovicik esan du kontu publikoak «kontrolpean» egongo direla oraindik ere. Defizit publikoa pixka bat handituko da euroaren eremuan —%0,8tik %1era—, Alemanian eta Herbehereetan superabit handiak txikitu egingo baitira, gastu programen ondorioz. Baina programa horiek oso txikiak direnez, Moscovicik bat egin zuen Europako Banku Zentralaren eskaera nagusiarekin: garai egokia dute gastu publikoa handitzeko, hartara jarduera ekonomikoa suspertzeko.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

Teresa Ribea Espainiako Trantsizio Ekologikorako ministroa, eskuinean, gaur. ©Chema Moya / Efe

Argindarraren gaineko zerga etetea aztertzen ari da Espainiako Gobernua

Iker Aranburu

Eguraldiak eta CO2a isurtzeko eskubideek prezioa asko garestitzen ari dira.

Solarparck burtsara atera zen eguna, 2018ko abenduan. Pablo Burgos eta Jose Galindo buruak. ©Miguel Toña / Efe

Solarpack erosiko du Suediako funts batek

Iker Aranburu

Getxoko eguzki energiako konpainiaren %100 erosteko eskaintza publiko bat egin du EQT Infraestructurek, eta saltzeko prest dira akziodun nagusiak.

Maiatzaren 28an protesta egin zuten Bilbon, 'Hemen ez dago inor soberan' lemapean ©Aritz Loiola/FOKU

Lan gatazka ezberdinetan murgildutako langileek protesta bateratua deitu dute ostiralerako, Bilbon

Aitor Biain

Petronor, UTE Bilboko Argiak, Novaltia, PCB eta Tubacexeko langile batzordeek antolatu dute maniestazioa. Enplegu duina eta kalitatezkoa aldarrikatuko dute, eta 2010eko, 2011ko eta 2012ko lan erreformak baliogabetzea. 

Ursula von der Leyen eta Joe Biden, atzo, Bruselan, akordioa iragarri eta gero. ©OLIVIER HOSLET / EFE

Hegazkingintzak eragindako gerra komertziala bukatu dute AEBek eta EBk

Xabier Martin

'Airbus-Boeing' auziak bultzatutako muga zerga guztiak bertan behera geratu dira bost urtez. Washingtonek aliatu bat nahi du Txinaren gorakada teknologikoaren aurrean

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.