Albistea entzun

Urkulluren hitzek haserrea eragin dute pentsiodunen mugimenduan

Lehendakaria «gezurretan» ari dela salatu dute, eta «gizartearen gehiengoari» bizkarra ematen ari zaiola. ELAk Ahal Dugu-ri egotzi dio bere printzipioei uko egitea; alderdi moreak «errespetua» eskatu du.

Astelehen honetan pentsiodunek Bilbon eginiko elkarretaratzea
Astelehen honetan pentsiodunek Bilbon eginiko elkarretaratzea / Luis Tejido/Efe Tamaina handiagoan ikusi

Jokin Sagarzazu -

2020ko urtarrilak 21 11:10

Giroa berotzen ari da. Geroz eta nabarmenago egiten ari da hilaren 30eko greba orokorraren aldekoen eta aurkakoen arteko aldea. Deitzaileek euren haserrea agertu dute egunotan Iñigo Urkullu Eusko Jaurlaritzako lehendakariak eta beste eragile batzuek —tartean Ahal Dugu-koak, CCOOkoak eta UGTkoak— eginiko kritikengatik.

Pentsiodunak mintzatu dira gogorren. «Justifikaezinak, nagusikeriazkoak eta sektarioak» izan ziren lehendakariak aurreko ostiralean emandako argudioak grebaren aurka egiteko eta deitzaileekin biltzeko eskaerari uko egiteko, Jon Fano Bizkaiko pentsiodunen mugimenduko bozeramailearen arabera.

ELA sindikatuko idazkari nagusi Mitxel Lakuntzak, berriz, Urkulluri ez ezik, Ahal Dugu-ri ere zuzendu dizkio bere kritikak. «Inkoherentetzat» jo du alderdi horrek greba ez babestea, eta «bere sorrerako printzipioei uko egitea» leporatu dio.

Ahal Dugu-k bere erabakia «errespetatzeko» eskatu du; gosari informatibo batean, Andeka Larrea komunikazio idazkariak azaldu du grebako aldarrikapenekin bat datorrela bere alderdia —militanteei parte hartzeko askatasuna eman die—; dena den, uste du ez dela «garairik egokiena» gisa horretako mobilizazio batera deitzeko, haren ustez, eskaera horietako batzuk Espainiako gobernu berriak «konpontzeko bidean» jarri dituelako, eta horietako batzuk, halaber, jasotzen direlako Eusko Jaurlaritzarekin eginiko aurrekontu akordioan.

Gehiengoak eta asimilatuak

Astelehenero legez, Bilboko udaletxearen aurrean mobilizatu dira pentsiodunak. Espainiako Gobernuaren azken neurriak ere izan dituzte gogoan; pentsioak %0,9 igotzeko erabakia «barregarritzat» jo dute, guztiei berdin ezarriko dietelako, kopuruak aintzat hartu gabe, eta ez dituelako kontuan hartzen kotizaziopekoak diren ala ez. «Tontotzat hartzen gaituzte igoera horrekin pentsio guztien erosteko ahalmena bermatzen dela esaten digutenean», adierazi du Jon Fano bozeramaileak. «Datu hauekin eskutan, borrokan jarraitzea beste erremediorik ez dugu».

Urkulluk ostiralean esandakoak ere gogoratu ditu, eta «gezurretan» aritzea leporatu dio. «Guztiz faltsua da [Jaurlaritzak] eskumenik ez duela pentsioen inguruan, diru sarrerak bermatzeko errentaren bidez osatzen baititu pentsio txikienak». Lehendakariari egotzi dio «enpresari handiekin eta bankariekin» bat egitea, eta «gizartearen gehiengoari —langileei eta pentsiodunei—» bizkarra ematea. Ohartarazi du «instituzioetan inskrustatuta» dauden eragileek «neurriz kanpoko kanpaina» bat abiatu dutela grebaren aurka.

Dagoeneko 1.200 enpresatako langile batzordeek bat egin dute deialdiarekin, ELAk jakinarazi duenez; Lakuntzaren arabera, enpresa handi batzuetan CCOO eta UGTko kideek ere babestu dute mobilizazioa; adibidez, Mercedes auto ekoizlearen Gasteizko lantegian—. «Oso zaila da grebaren aurka egotea; zoritxarrez, greba orokor batera deitzeko arrazoiak sobera ditugu».

ELAko buruzagiak Radio Euskadin eginiko elkarrizketa batean erantzun die kritikei. Bereziki «kezkatuta» agertu da Ahal Dugu-koen jarrerarekin. «Alderdi sistemikoak asimilatuak» izaten ari direla uste du, eta «jatorriko printzipioei» uko egiten ari direla. Eusko Jaurlaritzaren aurrekontuak babestearen truke «ezer gutxi» lortu dutela azpimarratu du Lakuntzak: «Aurrekontuen %0,75 baino ez dute aldatu».

Espainiako Gobernua osatzeko akordioan, halaber, ez du «konpromiso zehatz zein espliziturik» ikusten pentsioen alorrean eta Mariano Rajoyren gobernuaren (PP) lan erreforma bertan behera uzteko; are, uste du «arriskua« dagoela «inboluzio» bat gertatzeko negoziazio kolektiboen estatalizazioan.

Greba politikoa

Lakuntzak aitortu du grebaren aldarrikapen batzuek «zuzen-zuzenean» egiten dutela Eusko Jaurlaritzaren politiken aurka, eta, Urkulluk esandakoaren kontrara, ukatu egin du gobernuak ez duela eskumenik eskaera horiei erantzuteko. «Gezurretan ari da; adarjotzea iruditzen zaizkit hitzok». Besteak beste, gogoratu du pentsioak «osatzeko eta hobetzeko» eskumenak dituela, eta lehendakaria dela «herri honetako enplegu emaile nagusia», zuzenean eta zeharka. «[Espainiako] Estatu osoko langile publikoen artean, hemen dago behin-behinekotasun handiena», salatu du.

Urkulluk gehiengo sindikaleko ordezkariekin biltzeko eskaerari uko egin izana ere kritikatu du Lakuntzak: «Oso kezkagarria da, erakusten duen maila demokratiko eskasagatik». «Gizarte honen zati batengandik geroz eta urrutiago dagoen lehendakari bat da. Ez du arazorik patronalaren bozeramaile lanak egiteko. Arrazoia ematen diotenekin hitz egiten du».

Grebaren izaera «politikoa» dela-eta eginiko kritikei ere erantzun die ELAko buruzagiak. «Noski badela. Horrelako aldarrikapenak jasotzen ditugunean, politika egiten ari gara, horien oinarrian dauden erabaki politikoak aldatu nahi ditugulako».

Sareko BERRIAzalea:

Udazkenean, BERRIAlagun egiteko pausoa eman dezazun, eskaintza bat egin nahi dizu BERRIAk. Herri baten kulturaren plaza da BERRIA. Kultur egitasmo, dinamika eta ekitaldi anitzen erakustoki. Euskal kulturaren inguruko informazioaren plaza handia. Azaroan eta abenduan, Euskaraldiak, Bertsolari Txapelketa Nagusiak eta Durangoko azokak hartuko dituzte, besteak beste, BERRIAren orrietako asko, paperean eta webgunean.

Albiste asko irakurriko dituzu, segur aski webgune honetan bertan. Eta eskari bat egin nahi dizugu: har ezazu konpromisoa irakurtzen duzunarekin. Irakurleen babes ekonomikoa funtsezkoa da BERRIAren etorkizuna ziurtatzeko.

Albiste gehiago

Ibilgailuak, A63 autobidean, artxiboko irudi batean. ©Guillaume Fauveau

Frantziako Gobernuak 100 euroren laguntza emango die autoa lanerako behar dutenei

Iker Aranburu

Abenduaren 31n agortuko da erregaiaren hamar zentimoren deskontu orokorra, eta hortik aurrera langile apalenentzat izango da laguntza. 

Macron, atzo, Albaniako hiriburuan. ©Malton Dibra / EFE

Macron: «Fikzioa dira argindar mozketak»

Berria

Argindar mozketei buruzko eztabaida beroa hoztu nahi du Emmanuel Macron Frantziako Errepublikako presidenteak.

Eguzki plakak eta haize errotak Dongtain, Txinako Jiangsu probintzian. ©ALEX PLAVEVSKI/ efe

Energia krisi globala ziztu bizian ari da indartzen berriztagarrien hazkundea

Irune Lasa

Energia segurtasunaren inguruko kezkak areagotu egin ditu inbertsioak. IEAren arabera, eguzki energia fotovoltaikoak 2027an gaindituko du ikatza

Lanbideren bulego bat Donostian ©Juan Carlos Ruiz/Foku

DSBEaren lege proiektua bertan behera uzteko eskatu du ELAk

Aitor Biain

Sindikatuak uste du proposamena «oso urrun» dagoela mugimendu sozial eta sindikalen aldarrikapenetatik. Ezkerreko alderdiei eskatu die ordezko proposamenak aurkezteko. 

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Hitzen, ekintzen eta errimen eztanda. Herri bat BERRIAren kulturaren plazan. Baliatu udazkenean BERRIAlagun egiteko eskaintza.