Zaldibarko luizia

Balkoiak betetzeko deia egin dute, erantzukizun eske

Bi hilabete igaro dira Zaldibarko hondakindegia amildu eta bi langile desagertu zirenetik. Zaldibar Argitu plataformak erantzukizunak exijitu ditu, eta apirilaren 6an balkoietan mobilizatzeko deia egin du.

Gertatutakoa salatzeko, balkoetatik ari dira protesta egiten Zaldibarren. MARISOL RAMIREZ / FOKU
Iosu Alberdi.
2020ko apirilaren 2a
17:14
Entzun

Apirilaren 6an bi hilabete beteko dira Eitzagako zabortegia amildu zenetik. Ordutik, desagertuta daude Joaquin Beltran eta Alberto Sololuze langileak, milaka tona zaborren azpian. Data hori kontuan izanik, mobilizatzeko deia egin du Zadibar Argitu plataformak, konfinatuta egon arren. Horretarako, asteleheneko 20:30ean balkoietara atera eta «burrunba» egiteko eskatu dute, bost minutuz. Ondoren, kandelak eta argiak pizteko deia egin dute, bi langileen omenez.

«Ez dakigu nola esan. Nahikoa da. Langileak aurkitu behar dituzte, beharrezko baliabide guztiak jarrita», adierazi du plataformak, komunikatu baten bidez. Gaineratu dute lanean jarraituko dutela «langileak aurkitu arte», eta herritarren osasuna babesteko. Plataformaren ustez, beharrezkoa da zabortegian dauden hondakinak aztertu eta horien berri ematea, eta instalazioetan gertatutakoaren azalpenak jasotzea. Uneotan Eitzagako zabortegian martxan dauden lanen inguruan, beharginen segurtasuna bermatzeko neurriak exijitu dituzte.

Zaldibar Argitu plataformak erantzukizunak ere eskatu ditu, azpimarratuta «erantzule zuzenak egon arren» inork ez dituela «erantzukizunak bere gain hartu». Eusko Jaurlaritzako Ingurumen sailburu Iñaki Arriolari egin diote erreferentzia, «dimititu behar duela» nabarmenduta. «Ezin dute beste alde batera begiratu. Hemen geratu dena eta gertatzen ari dena oso larria da eta azalpenak merezi eta behar ditugu», azaldu dute.

Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Orain, aldi berria dator. Zure aldia. 2025erako 3.000 babesle berri behar ditugu iragana eta geroa orainaldian kontatzeko.