EAJk Gurutzetan (Barakaldo, Bizkaia) duen batzokian pintaketak agertu dira. Patxi Ruiz presoaren egoera salatzen duten pintaketez gain —gose eta egarri greban dago joan den astelehenetik—, «amnistia» eta«errudunak» ere idatzi dute egileek. Joan den astean, Gernikako, Errepeleagako (Portugalete), Mungiako, Algortako, Getxo Zaharreko, Berangoko, Igorreko eta Bilboko Sabindarrak batzokietan ere azaldu dira pintaketak.
PSE-EEren egoitzetan ere agertu dira pintaketak. Barakaldoko (Bizkaia) egoitzan gaur agertu dira eta aitzinetik Durango, Sopela, Algorta Portugalete, Bilboko Santutxun eta Deustun dituzten egoitzetan ere azaldu dira pintaketak.
Bi alderdiek gogor salatu dute beren egoitzatan pintaketak egin izana. «Eraso horiek agerian uzten duten gauza bakarra zera da: anonimotasunean koldarki babestuta dauden pertsona horiei bide demokratiko luzea egitea falta zaiela», salatu du Bizkai Buru Batzarrak (BBB) ohar bidez. Erasoak «justifikaezinak» direla nabarmendu du BBBk, eta alderdi denei eskatu die «erasoak» publikoki salatzeko.
EAJren bide beretik, PSE-EEk ere gogor salatu ditu bere egoitzetan egindako pintaketak. Pintaketak «ekintza biolento» eta «mafiosoak» direla salatu du Mikel Torres Bizkaiko alderdi sozialistako idazkari nagusiak, eta alderdi denei publikoki salatzeko eskatu die. «Eraso hauek iraganaren parte dira; garaiz eta lekuz kanpo daude», salatu du.
