Noiz sortua: 2020-05-29 15:28:44

Arrazakeria AEBetan

Telebista talde oso bat atxilotu dute AEBetan, zuzenekoaren erdian

Minneapolisko Poliziak gizon beltz bat itota hil zuelako piztu diren istiluak grabatzen ari ziren. Dagoeneko hiru gauez gertatu dira liskarrak, George Floyden hilketaren ondoren.

Omar Jimenez aurkezlea atxilotzen, zuzenean.
Omar Jimenez aurkezlea atxilotzen, zuzenean. CNN Tamaina handiagoan ikusi

Edu Lartzanguren -

2020ko maiatzak 29

Joan zen astelehenean, George Floyd gizon beltza itota hil zuen Minneapolisko polizia zuri batek. Hilketak istilu olde handia eragin du hirian eta AEBetako beste hainbat lekutan. Protestalariek su eman diote poliziaren etxe bati. Gaur, istiluen ondorioen berri ematen ari zen CNN kateko kazetari talde oso bat atxilotu du Poliziak, zuzenekoa egiten ari zirela.

Manifestazioak egin dituzte New Yorken, Denverren, Los Angelesen eta Chicagon, besteak beste. Istiluak gertatu dira ondoren horietako hainbatetan. Donald Trump AEBetako presidenteak «matoi» deitu die manifestariei, eta Guardia Nazionala zabalduko duela ohartarazi die hiriko agintariei, «ordena» berriz ezartzeko. «Arpilaketa hasten denean, tiroketa hasten da», mezua zabaldu du Twitterren bidez, eta sare sozialak ezabatu egin dio, «indarkeria goresten» duten mezuen aurkako politikari jarraikiz. Gero berriz jarri dute ikusgai.

Atzo arratsaldean jendetza elkartu zen Minneapolisen, Floyd hil zuten polizien egoitzaren aurrean, eta su eman zioten eraikinari. Aurretik, Guardia Nazionalari deitu zion Tim Waltz Minnesotako gobernadoreak, «bake garaiko larrialdia» deklaratuta. Aurreko gauean ere, istilu handiak gertatu ziren.

Nazio Batuen Erakundeko giza eskubideen buru Michelle Bacheletek ere gaitzetsi du Floyden hilketa, eta beste hainbeste egin dute hainbat kirolarik eta artistak, tartean Justin Bieber, Beyonce, John Boyega eta LeBron James.

Floyden heriotzak mahai gainean jarri du berriro Ameriketako Estatu Batuetako Poliziaren arrazakeria. Iragan astelehenean, iparraldeko Minneapolis hiriko Poliziak Floyd atxilotu zuen, ustez saltoki batean hogei dolarreko billete faltsu bat erabiltzeagatik.

Lurrean etzan, eskuburdinak ipini, eta polizietako batek belauna jarri zion lepoan zazpi minutuz. Asteon zabalduriko bideo batean ikusi eta entzun daitekeenez, Floydek behin baino gehiagotan esaten du ezin duela arnasa hartu; Poliziak, ordea, ez zuen aldatu jokabidea, eta, azkenean, Floydek konortea galdu zuen. Poliziaren bertsioak dio nabaritu zutela «zailtasun medikoak» zituela eta anbulantzia bati deitu ziotela. Ospitalean hil zen.

 

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Covid-19 daukaten gaixoak zaintzen duten bi erizain besarkatzen 55 egun gaixo zeraman gizon bat sendatzean. ©Andoni Lubaki / Foku

Koronabirusaren azken datuak

Berria

Euskal Herrian 31.166 gaixok eman dute positibo guztira, koronabirusa atzemateko probaren bat eginda. Horietatik 2.150 hil dira. Grafikoak, albiste barruan.

Hauteskunde Batzordeak bihar aztertuko du Ordiziako egoera

Hauteskunde Batzordeak bihar aztertuko du Ordiziako egoera

Arantxa Iraola - Jon Ordoñez Garmendia

Ordiziako positiboekin lotutako 48 kasu zenbatu dituzte dagoeneko. Maskara erabiltzea nahitaezkoa izango da Gipuzkoako herri horretan, eta tabernetako jarduna mugatu egingo dute. Beste taberna bat itxi dute, langile batek «positibo ahula» eman duela eta.

PCR probak egiten, aste honetan, Ordizian. ©JON URBE / FOKU

Maiatzaren 20tik ez zen hain datu txarrik positibo berrietan

Mikel P. Ansa

Hego Euskal Herrian azkeneko 24 orduetan 35 kasu positibo berri agertu dira PCR probak eginda. Maiatzaren 20an 31 kasu izan ziren, eta hilabete eta erdian ez da hain emaitza txarrik izan.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna