Iñigo Vallejo euskal presoa Sevilla II espetxetik Dueñaseko kartzelara (Palentzia) gerturatu dute. Espainiako Espetxe Erakundeek uztailaren 21ean jakinarazi zuten Vallejoren, Miguel Guillermo San Argimiroren eta Gorka Vidalen lekualdaketa.
Vallejo 2013an sartu zuten preso, ETArekin zerikusia zuelakoan —lehergai batzuk izatea egotzi zioten—. 28 urteko zigorra jarri zioten, eta 2033an beteko ditu hiru laurdenak. Madrilen arabera, espetxe legedia onartu zuen, eta eragindako mina aitortu eta biktimekiko enpatia agertu zuen. Lehen graduan malgutasuna ezarri zioten.
PSOE Espainiako Gobernuan dagoenetik —2018ko ekaina—, 40 euskal preso hurbildu dituzte, eta hamabi Euskal Herriratu.
