Politika

Mundakako EAJk Mikel Bilbao alkate jeltzalearen aurkako zentsura mozioa aurkeztuko du

Mundakako EAJko udal batzarreko bost zinegotzien eta alkatearen arteko koordinazio faltak eragin du Bilbaoren aurkako mozioa aurkeztea.

jarraia186543.jpg
Lander Muñagorri Garmendia.
2020ko irailaren 7a
17:21
Entzun

Mundakako (Bizkaia) EAJko udal batzarrak Mikel Bilbao alkatearen aurkako zentsura mozioa aurkeztuko duela iragarri du gaur. Bilbao jeltzaleen zerrendaburua izan zen 2019ko udal hauteskundeetan, baina ez da alderdiko afiliatua. EAJk sei zinegotzi lortu zituen iazko bozetan, eta EH Bilduk, berriz, hiru.

Jeltzaleek azaldu dute EAJko udal batzarraren eta egungo alkatearen arteko «koordinazio falta» dagoela erabakiaren atzean. Hilabete korapilatsuak izango direla aurreikusten dutenez, proiektu bateratzaile bat gidatzeko garaia dela nabarmendu dute. Iazko ekainean izendatu zuten Bilbao Mundakako alkate, eta, orduz geroztik, haren eta gainerako bost zinegotzien arteko harremanak gaiztotuz joan dira, batez ere COVID-19aren pandemia kudeatu behar izan duten azken hilabeteotan. Egoera horrek «herritarrek merezi duten udal kudeaketa oztopatu du», eta horregatik hartu dute zentsura mozioa aurkezteko erabakia. Nolanahi ere, Mundakako jeltzaleek Bilbaori eskerrak eman dizkiote EAJren hautagaitzari baiezkoa eman izanagatik.

Datozen egunetan aurkeztuko dute udalean alkatearen aurkako zentsura mozioa. Bilbao ez denez alderdiko afiliatua, ezin diote EAJren barne araudiko neurriak ezarri, eta horregatik jo dute bide horretatik.

Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Orain, aldi berria dator. Zure aldia. 2025erako 3.000 babesle berri behar ditugu iragana eta geroa orainaldian kontatzeko.