Araban ia hirukoiztu egin da kasu berrien kopurua

Azken orduetan 807 positibo atzeman dituzte Hegoaldean, bezperan baino 47 gehiago. Araban ia hirukoiztu egin dira egun bakarrean detektatutako kasuak: zehazki, 131 izan dira. Nafarroan, berriz, nabarmen apaldu da positibo kopurua azken egunean. Hegoaldeko lurraldeetan, guztira 67 pertsona erietxeratu dituzte 24 orduan. Hildako bat izan da Nafarroan.

PCR proba bat, Zarautzen.
PCR proba bat, Zarautzen. Gorka Rubio/FOKU Tamaina handiagoan ikusi

Uxue Rey Gorraiz -

2020ko irailak 17

Azken egunetako joerari eutsi dio kutsatu berrien kopuruak, beste behin; gora egin du berriz. Azken egunean 807 kasu berri atzeman dituzte Hegoaldean. Araban izan da gorakadarik handiena: areago, ia hirukoiztu egin da 24 orduan erregistratutako positibo kopurua. Atzo emandako datuen arabera, 46 ziren kasu berriak. Gaur, aldiz, beste 131 positiboren berri eman dute. Bizkaian eta Gipuzkoan ere ugaritu egin dira kasu berriak: zehazki, 252 atzeman dituzte Bizkaian, eta Gipuzkoan, berriz, 188. Guztira, 11.125 PCR proba egin dituzte hiru lurralde horietan; egindako proba guztien %5,2k eman dute positibo.

Nafarroan, aldiz, nabarmen egin du behera egun bakarrean atzemandako positibo kopuruak, bi egunez jarraian hirurehun kasuren langa gainditu ondotik. Azken datuen arabera, 228 kasu atzeman dituzte bertan, aurreko egunean baino 73 gutxiago. Gainera, egindako PCR proben kopuruan ez da ia aldaketarik izan. 2.893 proba egin dituzte azken egunean, eta horien guztien %7,6k eman dute positibo.

Halaber, koronabirusarekin lotutako heriotza bat izan da Nafarroan. Osasun Departamentuak jakinarazi duenez, 70 urteko emakume bat da hildakoa.

Azken egunean 49 pertsona ospitaleratu dituzte Bizkaian, Gipuzkoan eta Araban, aurreko egunean baino zazpi gehiago. Nafarroan, berriz, 18 erietxeratu dituzte, eta ZIUn sartu behar izan dute horietako bat. Oraintxe bertan, 470 gaixok erietxeratuta segitzen dute Hegoaldean, eta 69 gaixo daude ZIUn, bezperan baino bi gehiago.

Zahar etxeetan, gero eta kasu gehiago

Egunetik egunera, positibo kopurua nabarmen ari da handitzen zaharren egoitzetan, baita egoiliarren heriotzen zenbatekoa ere. Bizkaiko Foru Aldundiak jakinarazi duenez, azken bi egunetan hiru egoiliar hil dira Bizkaiko zahar etxeetan, eta 205ek kutsatuta segitzen dute. Horietatik 26 ospitaleratuta daude. Halaber, beste agerraldi bat atzeman dute lurralde horretan; hamasei egoiliarrek eta hamabi langilek positibo eman dute Leioa laguntza zentroan.

Gipuzkoako Foru Aldundiak ere zahar etxeetako datuak gaurkotu ditu: azken orduetan hiru egoiliar hil dira Gipuzkoako zaharren egoitzetan, eta beste positibo bat atzeman dute.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

PCR proba bat, Gurutzetako ospitalean. ©Luis Jauregialtzo, FOKU

Positibo kopuruak goia jo du Nafarroan

Uxue Rey Gorraiz

Beste 749 kasu atzeman dituzte Hegoaldean, eta nabarmen ugaritu dira Nafarroan: 362 kutsatu detektatu dituzte azken egunean. 501 lagun daude erietxeratuta Hego Euskal Herrian, eta 82 gaixo daude ZIUetan.

Zestoa, artxiboko irudi batean. ©Gorka Rubio / Foku

Eraikin publikoak eta tabernak itxi dituzte Zestoan

Berria

28 kasu baieztatu dituzte azken egunetan, eta neurri murriztaileak hartu dituzte agerraldiari aurre egiteko asmoz. Datozen egunetan egoera «kontrolatzea» espero dute.

Iñigo Urkullu omenaldian ©Eusko Jaurlaritza

Koronabirusaren biktimak omendu dituzte Gasteizen

Uxue Rey Gorraiz

Iñigo Urkullu lehendakariak gidatu du ekitaldia. Pandemiarengatik hildakoak gogoratu ditu, eta elkartasuna adierazi die familiei. «Elkarrizketa soziala» bultzatu dadin galdegin du, bizikidetza sozialaren berreraikuntzarako.

Sindikatuen eta Sareren elkarretaratzea, presoen egoeraren harira Bilbon. ©Marisol Ramires/FOKU

Hainbat espetxetan komunikazioak eten dituztela salatu dute Sarek eta Etxerat-ek

Maria Ortega Zubiate

Presoek eta haien senideek “garai oso zailak” bizi dituztela adierazi dute bi elkarteek, eta pandemiak “salbuespenezko erregimenaren aplikazioa” areagotzen duela. Positibotzat jo dituzte Eusko Legebiltzarrean eta Espainian espetxe politika aldatzeko egindako adierazpenak.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna