«Desoreka bat dago NBEko [Nazio Batuen Erakundeko] estatu kideengandik jasotzen dugun babes politikoaren eta diru ekarpenen artean», adierazi zuen atzo Tamara Alrifai UNRWAko bozeramaileak. Ohartarazi du agentziak ez duela baliabide nahikoa jaso estatu emaileen aldetik. Agentzia «dirurik gabe» gelditu zen astelehenean.
Ondorioz, ezin izango du jarraitu oinarrizko zerbitzua ematen Ekialde Hurbilean banatuta dauden 5,7 milioi errefuxiatu palestinarrei. Esaterako, ezinezkoa izango zaio 500.000 haurrentzako osasun zentroak eta ikastetxeak hornitzea.
Agentziak «eskualdea egonkortzeko ekarpen garrantzitsua» egiten du, Alrifairen esanetan, eta orain ezin izango du lan hori egin, hain justu koronabirusaren pandemia hedatzen ari den honetan. COVID-19arekin kutsatutako errefuxiatu palestinarrak 200 inguru ziren uztailean, eta ia 17.000 azaroaren hasieran. UNRWAk hainbat neurri hartu ditu kutsatzeak mugatzeko. Horien artean, telefono bidezko arreta eta hezkuntza presentzialaren eta ez presentzialaren arteko uztartzea.
Ekialde Hurbileko errefuxiatu palestinarrei oinarrizko zerbitzua emateko, 28.000 langile ditu agentziak. Orotara, 43 milioi euro behar ditu horien soldatak ordaintzeko. Hilabete honen amaierarako nahikoa diru biltzea lortzen ez badute, «neurri etsigarriak» hartu beharko dituztela ohartarazi du Alrifaik. Hilabete amaierarako 25 milioi euro bildu beharra dauzka agentziak orain arteko zerbitzuari eusteko. Bestela, soldataren zati bat bakarrik ordaindu beharko die langileei, eta gainerakoa funts nahikoa biltzen duenerako atzeratu.
UNRWA 1948an sortu zen. Palestinako Gaza eta Zisjordania lurraldeetan, Libanon, Jordanian eta Sirian egiten du lan. NBEko estatu kideen ekarpenen bidez finantzatzen da oso-osorik.
