ITP Aero Castingseko zuzendaritzak gaur eman dizkio enpresa batzordeari kaleratu nahi dituen 90 langileen izen-abizenak, hain zuzen, beharginak batzarrera deituta zeuden egunean. Langileen ordezkarien iritziz, zerrenda gaur goizean ematea batzarra ezegonkortzeko «estrategia bat besterik ez zen». Eta batzarrak hain zuzen, greba mugagabea egitea erabaki du, langileen gehiengoaren babesarekin.
Abenduaren 23an amaitu zen erregulazio espedientea negoziatzeko epea ITP Aero Castingsen (lehengo PCB), akordiorik gabe. Hasiera batean, 136 langile kaleratu nahi zituen enpresako zuzendaritzak, eta joan den astean jakinarazi zien langileen ordezkariei azkenean asmoa 90 behargin kaleratzea zela.
Enpresa batzordearen agiriak ez du zehazten noiz hasiko den greba, baina azpimarratu du langile gehien-gehienek egin dutela bat azken asteetako greba egunekin. Era berean, enpresa aztertzen ari da auzitara jotzea.
ITP Aero Castingsek planta bat du Sestaon, eta beste bat Barakaldon: 530 langile guztira
