Albistea entzun

Zinema

'Mank'-ek lortu ditu Oscar sarietarako izendapen gehien

Hamar garaikur lortzeko aukera eskuratu du David Fincherren filmak. Chloe Zhaoren 'Nomadland' dute faboritotzat askok, hala ere, sei izendapen lortuta. Apirilaren 25ean banatuko dituzte sariak.

David Fincherren 'Mank' filmeko irudi bat.
David Fincherren 'Mank' filmeko irudi bat. Berria Tamaina handiagoan ikusi

Itziar Ugarte Irizar -

2021eko martxoak 15

Iazko Oscar sariek erakutsi bazuten 2019a pelikula egiaz txalotuen urtea izan zela —Joker, The Irishman, 1917 eta Gisaengchung/ Parasite-n urtea izan zen, besteak beste—, hurrengoa, 2020a, zinema munduarentzat espero gabeko urte nekeza izan dela erakutsiko dute aurtengoek. Pandemiak hainbat ekoizpen bertan behera utzi, beste batzuen filmaketa atzeratu, eta aretoak itxita izan ditu hilabete luzez, eta bada dioenik inoiz Oscar sarietarako izendapenik lortuko ez luketen filmak hautagaien artean egotea ekarri duela horrek. Iritziak iritzi, 93. Oscar sarietarako hautagaien zerrenda atzo argitu zuen azkenean Hollywoodeko Akademiak, Priyanka Chopra Jonasen eta Nick Jonasen eskutik, eta David Fincherren Mank-ek lortu ditu izendapen gehien, hamar denera. Seina lortu dituzte beste sei filmek: Chloe Zhaoren Nomadland, Florian Zelleren The Father, Lee Isaac Chungen Minari, Darius Marderren Sound of Metal, eta Shaka Kingen Judas and the Black Messiah. Apirilaren 25ean egingo dute garaikurrak banatzeko ekitaldia, Dolby antzokian (Los Angeles, AEB) —zehazteko dute oraindik formatua—.

Izendapen kopuruari begiratuta, beraz, Mank bihurtu da aurtengo Oscar sarietan garaile izateko hautagai nagusia. Citizien Kane idatzi zuen Herman Mankiewiczi buruzko biopic-a da filma, zuri-beltzean ondua, eta Orson Wellesen obra ezagunaren filmaketa prozesua kontatzen duena. Espero zen alderdi teknikoetako kategorietan izendapenak lortzea, baina kategoria nagusienetan beste hainbeste eskuratu ditu azkenean: filmik onena, zuzendaritza, argazkia, gizonezko aktorerik onena (Gary Oldman) eta taldeko emakumezko aktorerik onena (Amanda Seyfried), besteak beste. Ez du, ordea, egokituriko gidoi onenaren sarirako hautagaitza lortu, zeina Jack Fincherrek idatzi duen, zuzendariaren aitak.

Netflixen lan bat da Mank, eta baliteke lehen aldiz plataforma digital batek ekoitzitako pelikula batek irabaztea film onenaren Oscar saria, oraindik egundo gertatu ez dena —inoizko izendapen gehien lortu ditu, hala ere, Netflixek aurten—. Kinieletan, baina, ez du oraindik Nomadland-en lekua berdindu. Izan ere, Chloe Zhao zinemagile txinatar-estatubatuarraren filmak beste gutxik bezalako oihartzuna bereganatu du azken hiletan; Urrezko Globoetan garaile nagusia izan zen, eta kritikak gogor txalotu du. Frances McDormand du aktore protagonista filmak —emakumezko aktorerik onenaren sarirako izendatu dute—, eta dena galdu ostean AEBetako errepideetara karabanarekin aterako den andre baten istorioa du kontagai. Zuzendari onenaren sarirako ere izendatu dute Zhao, eta Fincher, Emerald Fennel (Promising Young Woman; bost izendapen lortu ditu denera), Lee Isaac Chung eta Thomas Vinterberg (Druk / Another Round) izango ditu lehiakide. Lehen aldia da bi emakume daudela zuzendari onenaren atalean izendatuta —denera, 70 andrazko daude hautagaien artean, inoizko gehien—.

Interpretazioaren alorrean, The Father-ek eta Minari-k hautagaitza berdinak lortu dituzte; gizonezko aktorerik onenaren sarirako eta taldeko emakumezko aktorerik onenaren sarirako izendatu dituzte, hurrenez hurren, aktore nagusiak: Anthony Hopkins eta Olivia Colman, eta Steven Yeun eta Yuh-jung Youn.

Zeresana eman du, bestalde, Maite Alberdi txiletarraren El agente topo dokumental onenaren sarirako izendatu izanak. Donostiako Zinemaldian izan zen filmarekin Alberdi; Donostia Hiria Publikoaren Saria irabazi zuen.

Kategoria nagusietako izendapen guztiak dira ondokoak:

Film onena:

The Father (Florian Zeller)
Judas and The Black Messiah (Shaka King)
Mank, (David Fincher)
Minari (Lee Isaac Chung)
Nomadland (Chloe Zhao)
Promising Young Man (Emerald Fennell)
Sound of Metal (Darius Marder)
The Trial of the Chicago 7 (Aaron Sorkin)

Zuzendari onena:

Thomas Vinterberg (Another Round)
David Fincher (Mank)
Lee Isaac Chung (Minari)
Emerald Fennell (Promising Young Man)
Chloe Zhao (Nomadland)

Emakumezko aktorerik onena:

Viola Davis (Ma Raney’s Black Bottom)
Andra Day (The United States vs. Billie Holiday)
Vanessa Kirby (Pieces of a Woman)
Frances McDormand (Nomadland)
Carey Mulligan (Promising Young Woman)

Gizonezko aktorerik onena:
Riz Ahmed (Sound of Metal)
Chadwick Boseman (Ma Raney’s Black Bottom)
Anthony Hopkins (The Father)
Gary Oldman (Mank)
Steven Yeun (Minari)

Taldeko emakumezko aktorerik onena:
Maria Bakalova (Borat Subsequent Moviefilm: Delivery of Prodigious Bribe to American Regime for Make Benefit Once Glorious Nation of Kazakhstan)
Glenn Close (Hillbilly Elegy)
Olivia Colman (The Father)
Amanda Seyfried (Mank)
Yuh-jung Youn (Minari)

Taldeko gizonezko aktorerik onena:
Sacha Baron Cohen (The Trial of the Chicago 7)
Daniel Kaluuya (Judas and the Black Messiah)
Leslie Odom, JR (One night in Miami…)
Paul Raci (Sound of Metal)
Lakeith Standfield (Judas and the Black Messiah)

Nazioarteko filmik onena:
Druk / Another Round (Danimarka; Thomas Vinterberg)
Shaonian de ni / Better Days (Hong Kong; Kwok Cheung Tsang)
Colectiv (Errumania; Alexander Nanau)
The Man Who Sold His Skin ( Tunisia; Kaouther Ben Hania)
Quo Vadis, Aida? (Bosnia eta Herzegovina; Jasmila Zbanic)

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Donostiako Elizbarrutiaren D'museoan, hamasei pieza ikus daitezke guztira. ©ANDONI CANELLADA / FOKU

Donostiako D'museoko Oteizaren lanak faltsuak direla salatu dute

Iñgo Astiz

Artistak Argentinan sortutako hamasei lan biltzen ditu Donostiako Elizbarrutiko D'museoko erakusketak, baina, Oteiza museoak dioenez, ez dira hark egindakoak
2019ko EHZko kontzertu bat, Irisarriko plazan. Aurten berriz ere dohainik izanen dira plazako ekitaldiak. ©BOB EDME

EHZ, berriz plazara

Joanes Etxebarria

Bihar hasiko da festibala Irisarrin, eta lau gunetan hedatuko da programazioa. Musika talde anitzek azken lana aurkeztuko dute
Berge, Behotegi, Kurutxarri, Aroztegi eta Feulie, atzo, Baionan. ©BOB EDME

Ipar Euskal Herriko zinemagintza ikertuko dute EHUko ikerlariek

Ainize Madariaga

Lapurdin, Nafarroa Beherean eta Zuberoan eta nagusiki euskaraz sortutako zinema aztertuko dute EHUko NOR ikerketa taldeko kideek
'Han ez banengo bezala' liburuaren aurkzpena, Donostian, artxiboko irudi batean. ©Jon Urbe / FOKU

Pasazaite argitaletxeak jarduna etetea erabaki du hamar urteren ostean

Jone Bastida Alzuru

Sare sozialen bidez eman du berria, eta adierazi arrazoi pertsonalak, familiarrak eta ekonomikoak tarteko hartu duela erabakia.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.