Albistea entzun

EUSKAL PRESOAK

Beste hiru euskal preso gerturatuko dituzte

Almeriako eta Murtziako kartzelak motibazio politikoko euskal presoz hustuko dira mugimenduak gauzatzean. Gainera, Marixol Iparragirre Euskal Herriratu egingo dute, behin-behinean.

Sindikatuek eta Sarek deituriko manifestazioa, Donostiako Zurriola pasealekuan.
Sindikatuek eta Sarek deituriko manifestazioa, Donostiako Zurriola pasealekuan. / Sare Herritarra Tamaina handiagoan ikusi

Jon O. Urain -

2021eko ekainak 4 14:27

Espainiako Espetxe Erakundeetako Idazkaritza Nagusiak jakinarazi du beste hiru euskal preso Euskal Herritik gertuago dauden kartzeletara hurbilduko dituela. Horietako bi, Iñaki Krutxaga eta Alberto Viedma, Almerian daude preso (1.005 km), eta, horiek lekualdatzean, ez da motibazio politikoko euskal presorik geratuko presondegi horretan.

Krutxaga Leonera gerturatuko dute (370 km). 2001eko urtarrilean espetxeratu zuten 30 urteko zigorra betetzeko, eta 2023an beteko ditu zigorraren hiru laurdenak. Almeriako kartzelako Tratamendu Batzordeak proposatuta, bigarren gradura igaroko da.

Viedma, berriz, Topasera lekualdatuko dute (460 km). 2002ko martxoan kartzelaratu zuten 30 urteko zigorra betetzeko, eta 2022ko azaroan beteko ditu hiru laurdenak. Hura ere lehen graduan zegoen, eta bigarrenerako gradu progresioa aitortu diote.

Patxi Ruiz euskal presoa ere hurbilduko dute, Murtziatik Leonera. Horrela, Murtziako presondegia ere desagertuko da euskal presoen sakabanaketaren mapatik. Ruiz 2002ko otsailean kartzelaratu zuten, 30 urteko zigorra betetzeko, eta 2025ean beteko ditu hiru laurdenak. Bigarren gradura igaro dute hura ere.

 Bestalde, Espetxe Erakundeek jakinarazi dute Marixol Iparragirre presoa «arrazoi judizialengatik» eta behin-behinean Zaballako kartzelara eramango dutela. Madrilen dago gaur egun.

Manifestazioa Donostian

Bestalde, Sare plataformak eta Gipuzkoako gehiengo sindikalak manifestazio bat egin dute gaur Donostian, euskal presoei ezartzen zaien «salbuespenezko legeria» amai dadila eskatzeko.  ELA, LAB, ESK, Steilas, Hiru, EHNE, CNT eta LKN sindikatuak elkartu dira, eta Saguestik abiatu dira, 11:30ean, Langileok bidean gara presoak etxeratzeko lelopean.

Amaieran irakurritako oharrean, deitzaileek nabarmendu dute Euskal Herriko gehiengo sindikal, sozial eta politikoak euskal presoei ezarritako «salbuespenezko espetxe politika» amaitzeko eskatu duela, eta «jendarte zibilaren mobilizazioari nahiz instituzioen interpelazioei esker, urratsak egiten» ari direla norabide horretan: «Ez nahiko genukeen bezainbeste, ez nahiko genukeen bezain azkar, baina pausoak ematen ari dira, euskal presoen gerturatzeari edota gradu aldaketari dagokionez». Beraz, prozesu hori «bururaino eramatea» nahi dute, «euskal preso guztiak Euskal Herriratuz, preso gaixo guztiak kaleratuz nahiz salbuespenezko neurri oro indargabetuz».

Prozesu hori «azkartzea» galdegin dute Sarek eta sindikatuek: «Oraindik ere preso eta senide gehiegi daudelako ehundaka kilometrok bereizita, baita larriki gaixo diren hemezortzi preso ere. Graduen progresioa ematen hasi bada ere, hirugarren gradua gutxi batzuei soilik ezarri zaie, eta asko dira hiru laurdenak beteak izan arren espetxean jarraitzen duten presoak edota Frantzian jada bete duten zigorra Espainian berriro betearazten zaien presoak ere».

Mobilizazioaren deitzaileek uste dute «legeak ematen dituen aukera guztiak baliatzea eta beharrezkoak diren neurri politiko eta administratiboak hartzea» beharrezkoa dela, eta, bide horretan, gakotzat jo dute euskal presoei lanerako sarbidea ematea: «Lanpostu bat izatea hirugarren gradura igaro ahal izateko beharrezko baldintza ere izan ohi da».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Rodriguez eta Otegi, Aieten, atzo. ©Jon Urbe / Foku

Otegi: «Bide baketsuaren aldeko apustua betirako etorri da»

Iosu Alberdi

Rodriguezek eta Otegik esan dute adierazpena ez dela erantzun bat jasotzeko egin. Jaurlaritzak eta Nafarroako Gobernuak urrats gehiago egiteko eskatu diote ezker independentistari.

Euskal Herriko Gazte Sozialisten Topaguneko une bat, joan den astean, Altsasun (Nafarroa). ©Jagoba Manterola / Foku

GKSk mugimendu sozialistaren aurkako kriminalizazioa salatu du

Paulo Ostolaza

Azaldu duenez, «maniobra politiko-polizial bat» da El Mundo egunkariak mugimendu sozialistako kideen erretratuekin artikulu bat argitaratu izana.

Ramon Jauregi, artxiboko irudi batean, 2019an. ©Angel Diaz / EFE

Ramon Jauregi: «Estatuari ez dagokio GALengatik barkamena eskatzeko ardura»

Paulo Ostolaza

Aitortu du «kontraterrorismoa» kaltegarria izan zela bake prozesurako, baina «ETAren inguru sozialaren ilegalizazioa» egokia izan zela defendatu du.

Sareren agerraldia gaur, Donostian ©Jon Urbe / FOKU

Espetxe politikaren aldaketa «sendotzeko», manifestaziora deitu du Sarek larunbaterako

Oihane Puertas Ramirez

ETAk jardun armatua eten zueneko hamargarren urteurrenaren bezperan, eskubide urraketa guztiei irenbidea emateko eskatu du plataformak. Manifestazioa 17:00etan aterako da, Antiguako tuneletik. Baieztatu du, besteak beste, Kataluniako preso politikoen ordezkaritza bat egongo dela, eta Gatibuk emanaldia egingo duela amaieran.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.