Albistea entzun

euskal presoak

Hiru preso Euskal Herriratuko dituzte, eta lau gerturatuko

Puerto III-n zeuden lau presoak hurbilduta, ez da motibazio politikoko euskal presorik geratuko Andaluzian.

Sarek iazko abuztuan Bilbon eginiko martxa.
Sarek iazko abuztuan Bilbon eginiko martxa. Aritz Loiola / Foku Tamaina handiagoan ikusi

Jon O. Urain -

2021eko uztailak 2

Kolpe bakarrean zazpi euskal presoren destino berriak jakinarazi ditu Espainiako Espetxe Erakundeetako Idazkaritza Nagusiak. Horietako hiru Euskal Herriratu egingo dituzte, eta lau, berriz, Euskal Herritik gertuago dauden kartzelatara hurbilduko.

Andoni Murga, Jon Zubiaurre eta Liher Aretxabaleta dira Euskal Herriratuko dituztenak. Murga Darocan dago (345 km), baina Martutenera ekarriko dute. 1996ko abuztuan kartzelatu zuten, eta 25 urteko zigorra betetzen ari da. Hiru laurdenak 2015eko maiatzean bete zituen. Zubiaurre eta Aretxabaleta, berriz, Burgostik (215 km) Zaballara ekarriko dituzte. Zubiaurre 2001eko martxoan sartu zuten kartzelan, 30 urteko zigorra betetzeko, eta 2023an beteko ditu hiru laurdenak, eta Aretxabaleta 2017ko uztailean sartu zuten espetxean, 40 urteko zigorra betetzeko; 2046an beteko ditu hiru laurdenak.

Gerturatuko dituzten lau presoak, berriz, Puerto III-ko presondegian (970 km) daude, eta, horiek mugituta, ez da motibazio politikoko euskal presorik geratuko Andaluzian. Gainera, laurei eman diete gradu progresioa, lehenetik bigarrenera. Jesus Mari Etxebarria Mansillara, Leonera (370 km) gerturatuko dute; 2002ko abenduaren 22an sartu zuten preso, 30 urteko zigorra betetzeko, eta 2025eko ekainean beteko ditu hiru laurdenak. Daniel Pastor, berriz, Zuerara (245 km) hurbilduko dute. 2011ko martxoaren 4an kartzelatu zuten, eta 2041eko otsailean beteko ditu zigorraren hiru laurdenak.

Horrez gain, Iñaki Bilbao Topasera (460 km) hurreratuko dute. 2002ko martxoaren 31n espetxeratu zuten, 68 urteko zigorra betetzeko. Eta Oscar Barreras Logroñora gerturatuko dute; 1996ko uztailetik dago preso, 30 urteko zigorra betetzen, eta iazko uztailean bete zituen hiru laurdenak.

Sare: «Fase berri baten aurrean gaude»

Andaluziako kartzelan euskal presorik ez dagoela-eta, Sare plataformak nabarmendu du «fase berri bat» zabaltzen dela horrela: «Elkarbizitzaren bidean herri gisa aurrera egiteko fase bereziki garrantzitsua; euskal preso guztiak etxera itzultzeko bidea garatzeko unea da». Inaxio Oiarzabal bozeramaileak esan du gerturatzeok presoen senide eta lagunen «zama arintzen» dutela, baina ez direla «amaiera»: «Urruntze politika guztiz amaitzeko prozesua eta euskal presoak etxera itzultzeko prozesua hasi da».

Erantsi du hori batez ere gradu progresioen bidez gauzatuko dela, eta hori izango dela Sareren eta herritar gehienen helburua aurrerantzean: «Helburu hori lehenbailehen betetzea espero dugu».

Foro Sozial Iraunkorrak ere amaitutzat eman du «presoen gizarteratze prozesuaren lehen fasea», eta gogora ekarri du bigarren fasea zazpi puntutan definitu zuela joan den asteartean. Horien artean daude egungo egoera trantsitorioa gainditu eta motibazio politikoko preso guztiak Euskal Herriko espetxeetara ekartzea, hirugarren graduan sailkatzea horretarako baldintzak betetzen dituztenak, baimen arruntak ematea, eta, finean, gizarteratze plan bat zehaztea, presoek beren banakako ibilbidean egiten dituzten urratsek ondorioak izango dituztela ziurtatzeko. Foro Sozialak egindako kalkuluen arabera, 119 presok baldintzak betetzen dituzte hirugarren gradua eskuratzeko, eta 34k irteteko baimen arruntak eskura ditzakete. Bigarren fase horri ekiteko «adostasun nahikoa» badagoela uste dute.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Milaka lagun elkartu ziren atzo Donostian egindako manifestazioan. ©JON URBE / FOKU

Milaka urrats «etxera bidean»

Maddi Ane Txoperena Iribarren

Euskal presoak Euskal Herrira ekartzea, «bizi osorako» zigorrak etetea eta gradu progresioei bide ematea galdegin dute Donostian. Urtarrilaren 8an berriro kalera ateratzeko deia egin du Sarek
Arnaldo Otegiri elkarrizketa EH Bilduk

Otegi: «Lehentasuna da herri sena berreskuratzea»

Berria

Egungo testuingurua aztertu du EH Bilduko idazkari nagusiak, eta hizpide izan ditu koalizio subiranistak epe motzera, ertainera eta luzera dituen erronkak.

Grande-Marlaska, artxiboko irudi batean. ©Javier Lizon / EFE

Grande-Marlaska: «Ezker abertzaleak ongietorriak saihestu behar ditu»

Paulo Ostolaza

El País egunkariak Espainiako Barne Ministroari egindako elkarrizketa argitaratu du. Esan du euskal presoen sakabanaketak jada ez duela zentzurik, eta EH Bilduk eta Sortuk egindako adierazpena ez dela nahikoa.

Maria Txibite, PSNren buru gisa berretsi dutenean, Iruñean. ©IÑIGO URIZ / FOKU

Maria Txibite PSNko idazkari nagusi izendatu dute berriro ere

Gotzon Hermosilla

Botoen %97,22 eskuratu ditu alderdiaren XII. batzarrean. Txibiteren ustez, PSN beharrezkoa da «Nafarroak aurrera egiten jarrai dezan»

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.