GAZTETXEAK

Gutxienez zazpi atxilotu Arrotxapeko gaztetxea husteko operazioan

Poliziaz bete da Iruñeko auzoa, eta hurbildu diren dozenaka herritar identifikatu dituzte. Polizia manifestariei oldartu zaie, eta oraingoz zazpi gazte atxilotu ditu. Bertan izan da Ion Orzaiz BERRIAko kazetaria.

Jone Arruabarrena - Ion Orzaiz
2021eko irailaren 2a
09:57
Entzun

Hustu eta eraisten hasi. Gaurko iragarrita zegoen Arrotxapeko gaztetxearen hustea, eta goizean goizetik Espainiako poliziaz, udaltzainez eta foruzainez bete da auzoa. Protestan ziren gazteei oldartu zaie Espainiako Polizia, pilotakadaka eta kolpeka. Bi ordu luzeko operazioaren ostean, Iruñeko Udaltzaingoak adierazi du gaztetxea «hutsik» zegoela, eta makineria astuna sartzeko baimena eman du. Iruñeko Udalaren asmoa da, gaztetxeaz gain, inguruko lantegiak botatzea, etxebizitzak eraikitzeko.

Gaztetxe ingurua militarizatzen zuten bitartean, gazte ugari bildu dira ate aurrean goizean goiz. Hasieratik hurbildu diren guztiak identifikatzen hasi da Espainiako Polizia, eta, gaztetxeko kideek adierazi dutenez, 08:10 ingururako 40 lagun identifikatu dituzte.

Helikoptero bat ere goizeko lehen ordutik ibili da gaztetxe gainean bueltaka, eta, Iosu Ganuza Hamaika Telebistako kazetariak adierazi duenez, identifikazio zenbakirik gabe egon dira poliziak.

08:30erako elkarretaratzera dei egin dute gaztetxeko kideek, eta, gainera, adierazi dute udalaren baimena zutela horretarako, Artika kalean. Poliziak, ordea, esan die Marcelo Celayeta etorbidean egin behar dutela protesta. Azkenean, protestara bildu direnak Marcelo Celayeta etorbidean elkartu dira. Gaztetxe ondoko errepide bat moztu nahi izan du Poliziak, baina protestariak bertan bildu dira, eta Poliziak zigorrak ezartzearekin mehatxatu ditu.

09:00etan langile bat gaztetxeko atea zabaltzen hasi da, Poliziak babestuta, eta minutu batzuk geroago ondoko lokala ere zabaldu dute, gazte batzuk gaztetxearen barruan itxita egon zitezkeelakoan. Gero, eraikuntza enpresa bateko behargin gehiago etorrarazi dituzte. Izan ere, gaztetxe barruan hormigoizko babes, pareta eta hesi gehiago aurkitu dituzte poliziek.

Sareetan gaztetxearen barruan dauden gazte batzuen argazkia zabaldu den arren, Poliziak ezin izan ditu aurkitu, ezin direlako gaztetxeko gela guztietara heldu, jarri dituzten oztopoen ondorioz. Zerra eta mailu pneumatikoak ere ekarri dituzte barruraino sartzen saiatzeko, eta Foruzaingoa ere etorri da, txakur batekin.

Manifestariei oldartu zaie Polizia, eta, lehenik, gazte bat atxilotu dute. Protestariak auzoan zehar sakabanatu dira Poliziarengandik babesteko, baina kontrol ugari jarri dituzte inguruetan, eta pilotakadak botatzen ibili dira.

Geroago, Foruzaingoko GIE edo Esku Hartze Berezietarako Talde espezializatuko kideak heldu dira, maskara beltzak jantzita. Identifikaziorik eta ikurrik gabeko bi furgonetatatik jaitsi, eta mailu eta zerra gehiago ekarri dituzte.

Gedar Langile Kazetak jakinarazi duenez, alboko zelaietara ihesi joan dira protestan ari ziren batzuk, eta Polizia haien atzetik joan da.

Azkenean, Poliziak aurkitu ditu gaztetxean itxita zeuden hirurak, baina oraindik ez ditu eraman. Inguruko istiluen ostean, zazpi lagun atxilotu dituzte: manifestari bat Marcelo Celayetako oldarraldian, bost lagun gaztetxetik gertu dagoen beisbol zelai batean eta beste gazte bat Arrotxapeko kale batean. Espainiako Poliziak General Chinchilla kalean duen komisariara eraman ditu atxilo. Gaztetxearen aldekoek elkarretaratzea egin dute polizia etxe aurrean, atxilotuei babesa adierazteko.

Bitartean, makinak gaztetxera sartu dira. Gaztetxeko gela guztietara sartzea lortu dutenean, ohartu dira barruan ez zegoela inor, eta sareetan zabaldu den argazkia zaharra zela, Udaltzaingoak emandako bertsio ofizialaren arabera. Gedarrek zabaldu duenez, gaztetxea gaur bertan eraisteko asmoa daukate, baina Iruñeko udaltzainburuak esan du balitekeela «hiru asteko lana» izatea. Hala ere, barrukoa botatzen ari dira makinak.

Gaztetxeko kideek Espainiako Poliziaren egoitza aurrera joateko dei egin dute, atxilotuei elkartasuna erakusteko.

Arratsaldean, protesta

Goizeko atxiloketak eta Poliziaren jarduna salatzeko, arratsaldeko 20:00etarako protestara deitu dute. Hasiera batean, Plaza Gorrian batzeko deialdia egin dute, baina protesta hori debekatu ostean, Maiteminduen Plazan egin dute protesta.

Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Orain, aldi berria dator. Zure aldia. 2025erako 3.000 babesle berri behar ditugu iragana eta geroa orainaldian kontatzeko.