1979ko Gernikako Estatutuan hitzarturiko eta oraindik eskualdatu gabeko transferentziez hitz egiteko hurrengo bilera ortzirale honetan eginen dute Eusko Jaurlaritzak eta Espainiako Gobernuak. Jaurlaritzak jakinarazi duenez, Olatz Garamendi Gobernantza Publiko eta Autogobernu sailburua Isabel Rodriguez Espainiako Lurralde Politikako ministroarekin bilduko da, 12:00etan, Lurralde Politikako Ministerioaren egoitza nagusian, Madrilen.
Uztailean Espainiako Gobernuan aldaketak egin ondotik eginen duten lehenbiziko bilera presentziala izanen da, eta «garrantzitsutzat» jo du Jaurlaritzak. Helburua: transferentzien egutegia «berreskuratzea».
Bi aldeek maiatzean izenpetu zuten aurten eskualdatuko diren lau eskumenen akordioa: espetxeak, errepide garraioa, ISSN kode bibliografikoa eta Ondarroako Itsas Barrutiko eraikina (Bizkaia) eskualdatzea hitzartu zuten orduan.
