Albistea entzun

Autogobernuan «aurrerapausoak» ematen jarraitzeko prest daude

Espetxe kudeaketa eta beste hiru eskumen transferitzeko akordioa sinatu dute Eusko Jaurlaritzak eta Espainiako Gobernuak. Bi aldeek adierazi dute akordiorako borondatea daukatela
Josu Erkoreka, Miquel Iceta eta Olatz Garamendi, atzo, Bilbon.
Josu Erkoreka, Miquel Iceta eta Olatz Garamendi, atzo, Bilbon. IREKIA Tamaina handiagoan ikusi

Igor Susaeta -

2021eko maiatzak 11

Gernikako Estatutuan jasotako lau eskumen transferitzeko akordioa lortu zuten Eusko Jaurlaritzak eta Espainiako Gobernuak joan den apirilaren 16an, eta atzo izenpetu zuten, Transferentzien Batzorde Mistoak Bilbon egindako bileran. Arabako, Bizkaiko eta Gipuzkoako espetxe kudeaketari buruzkoa da eskumen aldaketarik nabarmenena, eta Olatz Garamendi Jaurlaritzako Gobernantza Publiko eta Autogobernu sailburuak horrek «zalantzarik gabe» daukan pisu «sinbolikoa eta politikoa» azpimarratu zuen bileraren ondoren hedabideen aurrean egindako agerraldian: «Eduki sozial handia du, baita inpaktu handia ere aurrekontuetan». Nolanahi ere, errepide garraioaren, ISSN kode bibliografikoaren eta Ondarroako Itsas Barrutiko eraikinaren (Bizkaia) eskualdatzearen inguruan lortutako eta izenpetutako akordioei ere balioa eman zien Garamendik.

1979ko estatutuan jasotako eskumenak transferitzeak erakusten du, Garamendiren esanetan, «ituna eta akordioa» direla autogobernuan aurrerapausoak eman ahal izateko «modurik eraginkorrena». Bi gobernuek adostutako transferentzien egutegia aintzat hartuta, negoziatutako bigarren multzoko 11 eskumenek transferituta egon behar zuten joan den martxorako —lehen multzoan jasotako hiru eskumenak iazko otsailean eskualdatu zituzten—, baina oraingoz lau daude sinatuta. Kartzelen arloko eskumenak urriaren 1etik aurrera eskualdatuko dituzte.

Garamendik adierazi zuenez, «buru-belarri» ari dira lehen sorta horretako gai batzuk gauzatzeko lanean, eta «ahal bezain laster» helduko diete besteei ere. «Ez dugu amore emango falta zaizkigunak gauzatu arte, materia guztiak etxetik kudeatu arte». Sailburuaren iritziz, estatutuan jasota dauden eskumenak «ezinbesteko tresna» dira politika publikoak kudeatzeko, baita «herritarren ongizatea eta Euskadiren garapena bermatzeko» ere.

Miquel Iceta Espainiako Lurralde Politika eta Funtzio Publikorako ministroak ere lortutako akordioa goratu zuen, eta zehaztu autonomia estatuaren eta Gernikako Estatutuaren «garapenean» aurrerapausoak emateko balio duela: «Tresna bat dira gure lurralde ereduaren deszentralizazio politikoa eta administratiboa errealitate bilakatzeko».

Bileraren aurretik Radio Euskadin elkarrizketatu zuten, eta nabarmendu zuen gauza bat dela espetxeak kudeatzea eta beste bat espetxe politika kudeatzea, aldeak «garbi» geratu behar duela.

Josu Erkoreka Jaurlaritzaren lehen lehendakariordeak ere hitz egin zuen agerraldian. «Autogobernu handiagoa izateak ongizate handiagoa edukitzea esan nahi du», nabarmendu zuen. Eta gogorarazi zuen bi gobernuek «kronograma bat» daukatela adostuta, «negoziazio epeekin-eta», transferitzeko falta diren eskumen guztiak eskualdatzeko. Oroitarazi zuen, gainera, Jaurlaritzaren legegintzaldi honetarako helburua dela eskumen aldaketari dagokionez jasotakoa «bere osotasunean» betetzea.

Zazpi urte eta gero, Transferentzien Batzorde Mistoa 2018an batzartu zen atzera, eta bi urte geroago, 2020ko urrian, egutegi bat zehaztu zuen eskumenak transferitzeko. Horren arabera, hirugarren multzoko hamazazpi eskumenak aurtengo urrirako jaso beharko lituzke Jaurlaritzak, eta laugarrenekoak —Gizarte Segurantzaren kudeaketa ekonomikoari lotutako gaiak—, hurrengo urteko maiatzerako. Erkorekaren hitzetan, denbora behar da transferentziak egiteko, horietako bakoitza «artisau lan baten modukoa» delako.

Mendiaren mezua

Idoia Mendia PSE-EEren idazkari nagusia eta Jaurlaritzako Lan eta Enplegu sailburua Iceta alderdikidearekin bildu zen atzo, eta adierazi zion oraindik «bilera asko» egin beharko dituztela transferitzeko gelditzen diren eskumenez hitz egiteko.

Mendiak azpimarratu zuen eskuduntza horiek Lan eta Enplegu Sailari eragiten diotela «bereziki», eta, transferitzen «errazak» ez diren arren, uste du «akordio bat» lortuko dutela.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Irizpidea duzulako. Giroan zabiltzalako.

Zuk badakizulako.

Albiste gehiago

Idoia Mendia, Bilboko Campos antzokian egin den PSE-EEren BIltzar Ttipian ©Miguel Toña / Efe

Idoia Mendia ez da aurkeztuko PSE-EEren primarioetara

Joxerra Senar

PSE-EEren Biltzar Ttipian azaldu du duela urtebete hartu zuela «erabaki pertsonal eta politikoa» eta hala aurreratu ziola Pedro Sanchezi: «Ondoren zuek izan zarete lehenak jakiten», adierazi die militante sozialistei

Igor Uriart, Baionako epitegian, gaur arratsaldean ©Bob Edme

Igor Uriarte ez zigortzea erabaki du epaileak, errudun izendaturik ere

Ekhi Erremundegi Beloki

Gaur izan du auzi saioa Baionako epaitegian Frantziako Estatuko lurraldean bizitzeko zuen debekua urratzeagatik. «Berri biziki ona da», Maritxu Paulus Basurcoren hitzetan

Beatriz Artolazabal sailburua, artxiboko irudi batean. ©Monika del Valle / Foku

Jaurlaritzak ongietorrien gaitzespena sartu du Udaberri planean

Gotzon Hermosilla

Bizikidetzaren, giza eskubideen eta aniztasunaren planaren behin betiko bertsioa onartu du Gobernu Kontseiluak.

 ©CHRISTOPHE PETIT TESSON / EFE

«Ez da irreala instrukzio epaileak ez auzipetzea»

Ekhi Erremundegi Beloki

Egoitz eta Josu Urrutikoetxearen abokatuak Frantziako Justiziak euskal militanteei eman dien trataera gaitzetsi du, eta prozedurei buruzko argibideak eman ditu.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Egin BERRIAlaguna

Irizpidea duzulako. Giroan zabiltzalako.

Zuk badakizulako.

Egin BERRIAlaguna