Albistea entzun

Literatura

Olatz Mitxelena Larretak irabazi du Igartza saria

'Arrakalak' ipuin bilduma proiektuarekin lortu du literatur beka, eta urtebeteko epea izango du orain kontakizunak idazteko.

Olatz Mitxelena Larreta idazlea, gaur goizean, Donostian.
Olatz Mitxelena Larreta idazlea, gaur goizean, Donostian. Mailen Andres / Foku Tamaina handiagoan ikusi

Itziar Ugarte Irizar -

2021eko irailak 16

Lau ipuin aurkeztu zituen lehiaketara Mitxelenak (Oiartzun, Gipuzkoa, 1989) eta horiekin aurreratu gero landu nahi lukeen liburuaren mamia: narrazioak, diferenteak elkarren artean baina hari batez lotuak denak, pitzaduren hariarekin, hain zuzen. «Gizartearen barruan eta baita gizakiaren baitan ere, harremanetan sortzen diren pitzadurak agertuko dira ipuin guztietan: minak, obsesioak, beldurrak eta beste», adierazi du. Hortik liburu proiektuari oraingoz eman dion izena: Arrakalak. Urtebeteko epea du orain lana burutzeko, eta, azaldu duenez, bide horretan joan nahi du ikusten zenbat ipuinek osatuko duten azkenean liburua, zenbat ahots sartuko diren, zein tonu hartuko duen. «Plazer hori oparitu nahi diot orain neure buruari».

Formari dagokionez, «bi begirada» uztartu nahi dituela aurreratu du egileak. Hala erabaki zuela proiektua aurkeztean, eta hala eutsi nahi diola. «Intimoagoa izango da bata, eta jolastiagoa bestea; lehena hausnarketari lotuagoa eta bigarrena fantasiaren jolasei. Gustatzen zait literaturaren bidez gai ilunak izan daitezkeenetara modu horretan heldu ahal izatea». Horixe nabarmendu du Xabier Mendiguren Elkar argitaletxeko editoreak ere —Elkar da, Beasaingo Udalarekin eta CAF enpresarekin batera, bekaren antolatzaiea—, «egun nagusi den estilo errealistatik» at dauden kontakizunak ere landu dituela idazleak. Mitxelena: «Uste dut horrek distantzia bat hartzeko aukera ematen didala, hortik errealitatea hobeto begiratu eta eta bizitzaz modu zuzenago batean edo hitz egiteko».

Narrazioetan agertuko diren gaien artean, besteak beste, heriotza, laguntasuna, amatasuna eta zahartzea aipatu ditu idazleak. Irudipena du badirela zenbait auzi egunerokoan arreta jartzen ez zaienak, eta horiek arretagunera ekartzeko ere baliatu nahi ditu ipuinak. «Nahita bilatu dut bizitzaren alde ilunago bati begiratzea. Iruditzen zait batzuetan ezkutatu egiten dugula, salbuespentzat edo kontraesantzat hartu. Baina uste dut hori ere bizitzaren parte dela, gure parte». Nolanahi ere, ilunari heldu arren, Mendigurenek gehitu du ez direla «ipuin tristeak», kontrara, «argitasuna eta umorea» dutela erantsi du. Eta bat etorri da egilea: «Gustuko dut hori, gaia mingarria edo gogorra izan arren, irribarre batekin irakurri ahal izatea».

Mitxelenaren lehen liburua izango da bekarekin onduko duena. Idatzi, beti idatzi izan duen arren, hau «aukera berri bat» izango dela aipatu du. «Beti idatzi dut, baina ez asko eta ez maiz. Gaztetan Urruzuno literatur lehiaketa atera nuen, Filosofia ikasterakoan idazketarekin hurbileko esperientzia izan nuen, Idazle Eskolan aritu izan naiz... baina hau izango da luze jardungo dudan lehen aldia». 2019an, BERRIAren Bidaia eta Mendi Kroniken lehiaketa ere irabazi zuen, Grezia: Memoriaren postalak kronikarekin.

Erritmo paraleloak

35 urtetik beherako idazleentzako saria da Igartza, eta ibilbideko 24.a da Mitxelenak eskuratu duena. Sari emate ofiziala gaur arratsaldean egingo dute, Beasaingo (Gipuzkoa) Igartza jauregian, eta, ondoren, egileak urtebete inguruko denbora izango du liburua amaitzeko. Ondo bidean, 2023ko udaberrian argitaratzea da asmoa. Bitartean, iazko Igartza saridun Maddi Ane Txoperena idazle eta BERRIAko kazetariak Ez erran inori eleberria lantzen diharduela ekarri du gogora Mendigurenek, eta lan hori datorren urte hasieran emango dutela argitara. Haurtzaroan sexu abusua jasan zuen emakume bat izango du protagonista nobelak. Maiatzean argitaratu da, halaber, 2019ko Igartza irabazlearen lana: Irati Goikoetxearen Herriak ez du barkatuko.

Sareko BERRIAzalea:

Udazkenean, BERRIAlagun egiteko pausoa eman dezazun, eskaintza bat egin nahi dizu BERRIAk. Herri baten kulturaren plaza da BERRIA. Kultur egitasmo, dinamika eta ekitaldi anitzen erakustoki. Euskal kulturaren inguruko informazioaren plaza handia. Azaroan eta abenduan, Euskaraldiak, Bertsolari Txapelketa Nagusiak eta Durangoko azokak hartuko dituzte, besteak beste, BERRIAren orrietako asko, paperean eta webgunean.

Albiste asko irakurriko dituzu, segur aski webgune honetan bertan. Eta eskari bat egin nahi dizugu: har ezazu konpromisoa irakurtzen duzunarekin. Irakurleen babes ekonomikoa funtsezkoa da BERRIAren etorkizuna ziurtatzeko.

Albiste gehiago

Kepa Altonaga, atzo, <em>Axularren gerizapean</em> liburuaren aurkezpenean. ©JON URBE / FOKU

Itzalekoak, argitara

Jone Bastida Alzuru

Axular Egunaren «misterioa» argitu nahi izan du Altonagak bere azken liburuan: 'Axularren gerizapean'. Itzalean geratutako idazleei buruzko datuak bildu ditu
Vincent Bestaven, Jurgi Ekiza, Xan Bidegain eta Felix Buff, Willis Drummondeko kideak. ©GUILLAUME FAUVEAU

«Ez dago itxaropena beste biderik»

Julen Korkostegi Elortza

Willis Drummond musika taldeak «garai askotako soinuaren konbinazio bat» bildu du 'Hala ere' disko berrian. Kontraesanen ideiak inguratzen du lana, izenburutik hasi eta azalean ageri den mandarinaraino.
<b>Txomin Urriza, Camille Dizabo, Annelise Arnaud-Cazamayou eta Alan Billi, Orbel taldeko kideak.</b> ©FANNY MAILLARD

Orbel, isiltasunari plaza eskainita

Ainize Madariaga

'Lur hezea' diskoa jalgi berri du taldeak. Hirugarren obra honetan, giro «mistiko» eta «berezia» landu dute taldekideek
Rafael Moneok bere ibilbidean ondutako arkitektura proiektuen marrazkiz eta planoz josia da Nafarroako Artxiboko erakusketa aretoa. ©JAGOBA MANTEROLA / FOKU

Rafael Moneo, garabirik gabe eraikitzea

Uxue Rey Gorraiz

‘Rafael Moneo Nafarroan’ erakusketa zabaldu dute Nafarroako Artxiboan. Arkitektoaren ibilbidearen atzera begirakoa egiten du bildumak, eta haren bizitza pertsonalari ere egiten dio so

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Hitzen, ekintzen eta errimen eztanda. Herri bat BERRIAren kulturaren plazan. Baliatu udazkenean BERRIAlagun egiteko eskaintza.